Kreu i PDK-së, njëherësh deputet i Kuvendit të Republikës së Kosovës, Kadri Veseli, ka rikujtuar 26 Majin e vitit 1999 i cili ishte i përgjakshëm për 27 civilë shiqptarë të “Lagjes së Trimave” në Prizren, shkruan InLajmi.
Veseli ka shkruar se këta civilë u masakruan nga ushtria serbe si formë hakmarrjeje e egër e forcave serbe ndaj kësaj lagje dhe fshatrave të Vërrinit e Opojës të cilët ishin baza të UÇK-së gjatë luftës çlirimtare kundër Serbisë.
Ai ka shtuar se nuk do t’i ndalë përpjekjet për të krijuar mekanizmin , i cili sipas tij, dënon ata që kryen krime në Kosovë.
“Unë nuk do të ndalem në angazhimin tim për të themeluar Tribunalin për dënimin e krimeve serbe të kryera gjatë luftës në Kosovë” – përfundon komunikata.
Postimi i plotë:
26 Maji i vitit 1999, u kthye në tragjedi për popullin tonë në “Lagjen e Trimave” të Prizrenit. Forcat serbe vranë e masakruan 27 civilë shqiptarë të cilët kishin vendosur të mos largohen nga shtëpitë e tyre kur mijëra të tjerë po dëboheshin drejt Shqipërisë.
Vrasja e tyre 21 vite më parë ishte hakmarrje e egër e forcave serbe ndaj kësaj lagje dhe fshatrave të Vërrinit e Opojës të cilët ishin baza të UÇK-së gjatë luftës çlirimtare kundër Serbisë. Djemtë dhe vajzat e kësaj lagje ishin luftëtarët më të mirë e trima të UÇK-së.
Unë nuk do të ndalem në angazhimin tim për të themeluar Tribunalin për dënimin e krimeve serbe të kryera gjatë luftës në Kosovë. Ne nuk duhet të pushojmë së punuari për të vënë para drejtësisë të gjithë kriminelët serb që masakruan qytetarët tanë të pafajshëm.
