Ish-kryetari i Kaçanikut, Xhabir Zharku, qe dy ditë ka hyrë në grevë urie në qendrën e paraburgimit në Prishtinë.
Këtë e bëri të ditur avokati i tij, Tomë Gashi.
Gashi në një postim në facebook ka shkruar se arsyeja e futjes së klientit të tij në grevë urie është cilësia e dobët e ushqimit.
“As në kantinën që është brenda burgut nuk ka fare ushqime cilësore që mund të blihen nga të paraburgosurit.
Greva e tij është senzibilizuese që çështja e ushqimit në burg të përmirësohet.”
Avokati ka treguar se e ka vizituar Zharkun dhe ka paralajmëruar se gjendja e tij ka shenja të përkeqsimit.
“Sot e kam vizituar dhe gjendja e tij është stabile, me shenja të perkëqësimit” – ka shkruar mes tjerash Gashi.
“Mbetet ditëve në vijim që çështja e kualitetit të ushqimit të shqyrtohet nga udhëheqësit e Qendrës së Paraburgimit në Prishtinë dhe Shërbimit Korrektues të Kosovës”, ka thënë ai më tej , përcjell Klan Kosova.
Xhabir Zharku ndodhet në paraburgim që nga dhjetori i vitit të kaluar.
