Vigan Qorrolli, njohës i Kushtetutës, thotë se Gjykata Kushtetuese nuk bën të goditet për qëllime të politikës ditore dhe se integriteti i kësaj gjykate, nuk guxon të vihet në pikëpyetje, shkruan InLajmi.
Qorrolli në një shkrim në Facebook e ka kritikuar klasën politike të cilët kanë vënë dorë në Kushtetuese.
“Gjykata Kushtetuese është institucioni suprem i Republikës. Ajo nuk bën të goditet ultë dhe për qëllime të politikës ditore. Meqë brenda saj ka persona të lidhur fortë me politikanë të caktuar — integriteti i kësaj gjykate nuk guxon të vihet në pikëpyetje.
Qorrolli, tutje shkruan se “Gjykata është më e rëndësishme se interesat e politikës meskine, që i ka keqpërdorur pamëshirshëm edhe gurët e varreve të dëshmorëve”.
“Mos prisni mrekulli prej një kaste politikanësh, që demokracinë e kuptojnë si një film triller, e jo si një fundament të shtetësisë. Shoqëria jonë duhet të tregojë respekt për dinjitozët, e duhet t’i përbuz servilët dhe të kapurit”, përfundoi ai.
Në anën tjetër, Kryeministri në detyrë, Albin Kurti, nga një vizitë në burgun e Dubravës këto ditë ka deklaruar se do ta respektojë vendimin e Gjykatës Kushtetuese./InLajmi/
