Këshilli Prokurorial i Kosovës (KPK) ka mbajtur një takim online nën udhëheqjen e kryesuesit, Bahri Hyseni, ku janë diskutuar pikat sipas rendit të ditës.
KPK në këtë takim ka shpallur konkursin për tetë prokurorë të Shtetit, të cilët do të rekrutohen nëpër prokuroritë themelore.
Po ashtu, me qëllim të realizimit të procesit rekrutues KPK ka themeluar Komisionin për Rekrutim të prokurorëve të Shtetit, Komisionin për rishqyrtim dhe ka caktuar Administratorin e provimit.
Gjatë këtij takimi, anëtarët e KPK-së, kanë diskutuar, shqyrtuar dhe miratuar tri raporte të periudhave të ndryshme kohore të Mekanizmit Përcjellës Ndërinstitucional për veprat penale karakteristike: Raportin vjetor 2019, Raportin tre mujor janar – mars 2020 dhe Raportin krahasimor dhe analitik shtatëvjeçar.
Gjithashtu, është shqyrtuar Draftrregullorja për Organizimin dhe Veprimtarinë e Këshillit Prokurorial të Kosovës, e cila me disa plotësim-ndryshime edhe është miratuar.
Takimi ka vazhduar me shpalljen e brendshme për avancim për 4 pozita në Prokurorinë Speciale të Republikës së Kosovës.
Me skadimin e mandatit të zëvendëskryesuesit, KPK në pajtueshmëri me aktet nënligjore ka bërë thirrjen publike për nominimin e kandidatëve të interesuar për pozitën e Zëvendëskryesuesit të Këshillit Prokurorial të Kosovës, njofton Klan Kosova.
Në fund të takimit anëtarët e KPK-së kanë shqyrtuar dhe miratuar dy raporte për vlerësimin e performances së 9 prokurorëve me mandat të përhershëm.
