Nga foltorja e Kuvendit të Shqipërisë, kryeministri Edi Rama u shpreh se brenda muajit maj vendi do të jetë i hapur tërësisht nga masat e marra për pandeminë, falë menaxhimit të duhur të gjendjes.
“Nëse nuk do të kishim bërë gjërat e duhura mund të mos takoheshim këtu, por të numëronim humbjet e jetës, plagët e rënda dhe kolapsin në kushtet e një përballje, ku shumë shtete më të zhvilluara se ne e humbën”-ka thënë Rama drejtuar deputetëve.
Duke e lidhur një ngjarje personale me punën e tij në qeveri, Rama ka konsideruar se Shqipëria i’a ka dalë mbanë.
“Jeta më ka çuar dikur pranë një njeriu të zemrës në një spital amerikan në Massachusetts dhe kur kam hyrë në atë spital dhe kam parë se ç’ndodhte kam menduar se kjo këtu është dora e Zotit, se nuk ka mundësi. Përpara syve të mi kam parë atë qenie, që do të jepja jetën time që të kthehej nga koma dhe sot në atë vend ku gjendet ai spital numërohen deri tani 6 mijë të vdekur me vetëm dyfishin e Shqipërisë, por ne ia dolëm.”-ka rrëfyer kryeministri.
Ai konfirmoi se do të hapen edhe kufijtë dhe Shqipëria do të përgatitet për sezonin turistik, shkruan A2.
“Brenda majit Shqipëria do të jetë e hapur tërësisht, kufijtë do të jenë hapur dhe ne do të përgatitemi për sezonin turistik”, ka deklaruar ai.
