Deputeti i PDK-së Sejdi Hoxha u shpreh se Qeveria Kurti kishte premtuar reduktime të shpenzimeve, por u tregua e papërgjegjshme për menaxhimin e parasë publike, përcjell InLajmi.
Ai tha se kjo më së miri kuptohet në raportin financiar të tremujorit të parë TM1 (Janar-Mars )2020, gjë qe në këtë raport shihet qe kemi rritje enorme të shpenzimeve në shumicën e kategorive buxhetore.
Hoxha tha se ata premtuan zvogëlim të numrit të ministrive dhe pozitave të tjera shtetërore, por ky veprim doli të jetë për konsum politik.
“Shpenzimet për paga dhe rroga shënuan vlerën prej 154.59 milionë euro gjatë këtij tremujori, këtu kemi rritje të shpenzimeve prej 3% apo mbi 5.17 milionë euro më shumë krahasuar me shpenzimet e pagave në periudhen e njëjtë të vitit 2019” shkroi Hoxha në facebook.
Ai tha se shpenzimet në subvencione dhe transfere arritën shumën prej 143.89 milionë euro që paraqet një rritje prej 4.21 milionë euro, apo 3% më shumë krahasuar me periudhën e njëjtë të vitit 2019.
“Në këtë periudhë kohore kemi realizim më të vogël (mos realizim) te të hyrave buxhetore prej 62,370,000.00 me pak krahasuar me periudhen e njëjtë të vitit të kaluar, ndërsa projektet kapitale nuk janë realizuar as 50% në raport me periudhën e njëjtë të vitit të kaluar” shtoi ai.
Qytetar të dashur, maska e kësaj qeverie të papërgjegjshme do të hiqet shpejt dhe do ta kuptoni që të gjitha premtimet elektorale të këtyre partive në pushtet kanë qenë një mashtrim vetëm për egot e tyre për pushtet./InLajmi/
