Për më shumë se dy muaj qytetarët e vendit tonë po ballafaqohen me pandeminë COVID19, një virus ky i ri dhe ende i panjohur pavarësisht kërkimeve të shumta dhe krijimit të një vaksine.
Derisa, dje në Kosovë nisi aplikimi i Fazës së 2-të i masave lehtësuese të vëna nga Ministria e Shëndetësisë.
Lëvizja e lirë e qytetarëve u rrit në 4 orë, me mundësi shfrytëzimi 2 orë paradite dhe 2 pasdite me numër të parafundit të letërnjoftimit.
Po ashtu u hapën edhe një sërë biznesesh përfshirë, edhe Trafikun Urban dhe Ndërurban, por me kujdes të shtuar e duke praktikuar masat mbrojtëse.
Derisa, autobusët e trafikut urban kanë lëvizur që nga dje, sot në Stacionin e Autobusëvë në Prishtinë, thuajse s’pati ndonjë ndryshim nga ditët e kaluara.
Në një prononcim për Indeksonline, Drejtori i Stacionit të Autobusëve, Luan Hoti tha se ka pasur shumë pak nisje.
“Ka pas pak nisje, vetëm disa linja janë mbajt. Kanë qenë vetëm 22 nisje, nga Prizreni, Malisheva, Gjilani e Lipjani.
Ndërsa, në ditët normali i kemi rreth 400 nisje. Besoj pas fazës së tretë dhe linjat e kompanitë e tjera do të fillojnë punën, sepse është çështja sa i përket kufizimit të lëvizjes”, deklaroi ai.
Ditë më parë u paralajmërua për një mundësi të rritjes së çmimit të biletave për qytetarët që udhëtojnë me autobusë ndërurban, e lidhur me këtë Hoti tha se nuk ka ende asgjë zyrtare për këtë.
“Çështjen e çmimeve e cakton tregu dhe janë vetë ata autotransportues që i caktojnë çmimet e biletave, ndërsa sa i përket ndërmarrjes sonë mund të themi që nuk ka rritje të çmimeve dhe ato do të jenë të njëjta siç ishin edhe më herët dhe do të veprojmë sipas çmimeve që kemi në fuqi”, theksoi ai
