Deputeti i Lëvizjes Vetëvendosje, Hekuran Murati pas mbledhjes së Komisionit për Ekonomi ka thënë se anëtarët e këtij komisioni kanë kërkuar formimin e një komisioni hetimor për të shikuar se a ka pasur shkelje në licencat që janë dhënë për energji të ripërtërishme, pas raportimeve se një pronar i vetëm i ka marrë gjashtë licenca, raporton InLajmi.
“Ne si anëtar të grupit parlamentar të VV-së kërkuam që të krijohet një komision hetimor parlamentar në mënyrë që t’i trajtojmë të giitha ato dyshime dhe të vijmë në një përfundim”, tha Murati.
Mirëpo, ai tha se këtë nuk e mbështetën anëtarët e PDK-së dhe të LDK-së.
“Nuk kishte vullnet nga anëtarët e Komisionit që vinë nga LDK, PDK dhe të tjerë. Meqenëse nuk u hodh për votim ne u pajtuam që ta kemi për raportim ZRE-në që a mjafton ta formojmë një komision. Ne nuk e dimë pse ata nuk u pajtuan, por kësaj pune duhet t’i shkojmë në fund sepse veprime të tilla çojnë deri te shtrenjtimi i energjisë elektrike”, tha Murati.
Deputeti i NISMA-së, Endrit Shala tha se në këtë mbledhje të komisionit e kanë shqyrtuar një kërkesë të kryetares që të shqyrtohet një raport i një OJQ-je për ZRE-në.
“E shqyrtuam këtë raport. Dyshimi i ngritur është kompetencë e Agjencionit Kundër Korrupsionit, dhe presim që pasi AKK të merr vendimin e duhur atëherë ne të bëjmë veprime sipas ligjit”, tha ai.
Ai tha se Komisioni ka vendosur që t’i thërras në raport agjencionet të cilat i përgjigjen Komisionit për Ekonomi.
“Nga java e ardhshme do të fillojmë me raportin vjetor të ZRE-së, Autoritetit të Konkurrencës, AKP-së”, tha Shala./InLajmi/
