Më 18 maj 2020, do të fillojë faza e dytë e lirimit të masave, të cilat ishin vënë nga Qeveria e Kosovës për parandalimin e përhapjes së pandemisë për të filluar kështu nesër edhe hapja e sektorit të gastronomisë, për shërbimet “merr me vete” (take away), raporton InLajmi.
Pronarët e disa kafeterive e restoranteve sot po përgatiteshin për rihapje pas dy muajsh izolimi.
Qytetarët nga nesër mund të marrin me vete porositë, pasi ende nuk lejohet qëndrimi brenda objekteve, kjo si shkak i parandalimit të përhapjes së Covid-19.
Sot, po ashtu është parë një numër i madh i njerëzve të cilët kanë dalë në sheshet e Prishtinës. Madje disa prej tyre kishin zgjedhur sheshet për të ngarë biçikletat.
Edhe pse rastet e prekura me koronavirus po shtohen në ditët e fundit nga nesër do të lejohet dalja dy herë në ditë nga dy orë, sipas shifrës së parafundit në numrin personal të letërnjoftimit.
Përndryshe, Qeveria e Kosovës ka paralajmëruar se nëse nuk respektohen këto masa do t’i rikthejnë masat rigoroze sepse rrezikohet rikthimi i valës se pandemisë së virusit korona.
Në Kosovë janë testuar gjithsej 11.585 mostra të dyshimta në virusin SARS-CoV-2 dhe prej tyre pozitive rezultojnë gjithsej 978 raste, me gjithsej 29 raste të vdekjes të cilët kanë pasur sëmundje të tjera shoqëruese, derisa numri i përgjithshëm i të shëruarve deri më sot është 713 raste.
Këto janë llojet e bizneseve që do të rihapen nesër:
- Floktarët dhe sallonet e ondulimit
- Stomatologët dhe fizioterapeutët
- Tregtarët me pakicë dhe tregu i gjelbër
- Gastronomia (merre-me-vete, take away)
- Transporti hekurudhor
- Transporti urban dhe ndër-urban (me leje të veçanta)
- Qendrat e thirrjeve telefonike (me lista të stafit esencial), si dhe
- Hapja e galerive dhe muzeve./InLajmi/
