Në këtë recetë të lehtë të supës me brokoli, kombinoni bashkë qepë, hudhra, limon dhe borzilok të freskët. Përgatisni një supë të shijshme e të butë, burim shumë i mirë i vitaminës C dhe vitaminës K.(Recetë nga Renato Mekolli)
Përbërësit
Lëng pule ose lëng perimesh (afërsisht 1 litër)
300 gr brokoli
2 qepë të njoma
1 qepë e thatë
2 thelpinj hudhre
1 limon
2 lugë kos
1 tufë borzilok
50 gr gjalpë
100 ml vaj ulliri
Kripë
Piper
Grijmë në kube brokolit, qepët dhe hudhrat e pastruara. Grijmë shumë imët borzilokun dhe shtrydhim limonin.
Në një tenxhere vendosim pak vaj ulliri dhe shtojmë qepët dhe hudhrat. I përziejmë për pak minuta. Sa pa marrë ngjyrë, shtojmë brokolit.
I lëmë për pak minuta dhe shtojmë lëngun e pulës të ngrohtë (ose të perimeve), kripën dhe piperin.
E lëmë supën të ziejë derisa të ketë marrë shije dhe të jetë lidhur mirë.
Në 10 minutat e fundit shtojmë borzilokun, lëngun e limonit, kosin dhe gjalpin.
E kalojmë në multi procesor dhe nëse është e nevojshme, në një sitë të hollë.
