Limaj: Nuk do të ndalemi së kërkuari zbardhjen e fatit të Ukshin Hotit

Kreu i partisë “Nisma Social Demokrate” ka qenë në mesin e liderëve kosovarë që ka rikujtuar, në 21 vjetorin e zhdukjes, veprimtarin e shquar Ukshin Hoti, shkruan InLajmi.

Ai thotë se më tepër se dy dekada më pas nuk dihet asgjë për fatin e Hotit.

Po ashtu rikujton se në portofolin e Hotit ishte edhe specializimi i tij në një prej universitete më të shquara në botë “Harvard” të SHBA-së për shkenca politike.

“Ne nuk do të ndalemi së kërkuara zbardhjen e fatit të Ukshin Hotit.”-përfundon Limaj.

Postimi i plotë i tij:

Ishte 16 maji i vitit 1999, që në rrethana fatkeqësisht ende të pa ndriçuara është zhdukur veprimtari i madh, Ukshin Hoti. Sot, 21 vite më pas nga ajo ditë, ende nuk dihet asgjë për fatin e tij.

Ukshin Hoti ishte dhe mbetet ndër vizionarët e mendimtarët më të mëdhenj të kombit tonë. Ai kishte specializuar në “Hardvard” të SHBA-së për shkencat politike, publicist i shquar, profesor e filozof, por mbi të gjitha atdhetar dhe veprimtar i madh çështjes kombëtare gjatë viteve 1981-1999.

Ukshin Hoti me veprat e tij ka frymëzuar breza të tërë në rrugën tonë për liri e pavarësi dhe me të drejtë konsiderohet si ikonë e të drejtave dhe lirive shqiptare ngaqë ka punuar me shumë përkushtimin për arritjen e tyre.

Ne nuk do të ndalemi së kërkuari zbardhjen e fatit të Ukshin Hotit, këtij intelektuali të përmasave botërore me të cilin mburren gjithë shqiptarët, kudo që jetojnë e veprojnë./InLajmi/