Një ndër masat që kishte marrë Qeveria e Kosovës,qysh nga fillimi i pandemisë me koronavirus në vend përkatësisht Ministria e Punëve të Brendshme dhe Administratë Publike, ishte edhe ndalimi i qarkullimit të transportit urban dhe ndërurban në tërë territorin e Kosovës.
Qe nga e hëna më 18 maj do të fillojë edhe zbatimi i fazës së dytë, ku në këtë fazë parashihet të fillojë qarkullimi i trafikut urban dhe ndërurban, por me leje të veçantë.
Këtë e ka bërë të ditur edhe gjatë ditës së djeshme kryeministri në detyrë, Albin Kurti në një konferencë për media.
“Nga e hëna do të hapen flokëtaret, stomatologët dhe fizioterapeutët , transporti hekurudhor, transporti urban dhe ndërurban si dhe hapja e galerive dhe muzeve. Cdo qytetari do t’i lejohet dalja dy herë në dite nga dy orë sipas numrit të parafundit të letërnjoftimit. Ky sukses në luftimin e pandemisë ka ardhur nga guximi që patëm në luftimin e pandemisë”, ka thënë Kurti.
Kurti, ka deklaruar se deri sa po hyjmë në një fazë të re është e rëndësishme të ruajmë distancën, higjienën dhe mos të shkojmë tek njëri-tjetri.
Lidhur me nisjen e punës së “Trafikut Urban” në kryeqytet ka folur, Lulzim Rexhepaj, kryeshef i Ndërmarrjes Publike të Komunës së Prishtinës “Trafiku Urban”.
Rexhepaj, ka thënë se po presin sqarime shtesë për të parë nëse do të lëvizin të gjithë autobusët urbanë nga e hëna në kryeqytet.
“Vetëm që është ende e paqartë se si do të lëvizin, por deri të hënën pritet me u sqaru kjo. Po bëjmë përgaditjet tona, auobusët janë servisu, janë teknikisht të përgaditur, janë dezinfektu dhe po presin në parking. Kemi vendos edhe njoftimin në hyrje dhe në dalje të autobusit ku udhëtarët patjetër duhet ta kenë të vendosur maskën dhe ky është kushti i parë për të hyrë në autobus të Trafikut Urban, të respekohet distanca dhe të ulen në karriken të cilat janë të lejuara për t’u ulur sepse kemi vendos shenja, pra kemi bërë shenjëzim dhe me këtë kemi treguar se ne cilat vende mund të ulen”, ka thënë Rexhepaj.
Rexhepaj, ka shpjeguar edhe masat e ndërmarra në autobus në mënyrë që udhëtarët të ndihen të sigurtë.
“Brenda në autobus kemi vendos edhe dezinfektues ku qytetarët munden me i pastru duart edhe në hyrje por edhe ne dalje. Ne jemi përgatitur, tash i takon nivelit qendror, pra Qeverisë dhe Komunës së Prishtinës me na sqaru se si do të lëvizin”, ka deklaruar Rexhepaj për Insajderin.
Mirëpo, ka thënë se numri i udhëtarëve do të jetë më i vogël, në krahasim me muajt e mëparshëm para përhapjes së koronavirusit.
“Numri i udhëtarëve ka qenë vetëm 20 në një autobus”, ka thënë a.
Derisa sa më 18 maj fillon faza e dytë e lehtësimit të masave, më një qershor, në fazën e tretë, Qeveria ka planifikuar lejimin e qarkullimit të trafikut urban dhe ndërurban në përgjithësi sikurse kanë qarkulluar më herët.
