Me mijëra punëtorë dhe me mijëra biznese të kompanive të ndryshme private në Kosovë, kanë parashtruar ditëve të fundit kërkesa në Administratën Tatimore të Kosovës (ATK), në mënyrë që të përfitojnë mbështetje nga pakoja emergjente fiskale e Qeverisë së Kosovës, përcjell InLajmi.
Qeveria e Kosovës nga mesi i muajit masr 2020 mori vendim për mbylljen e bizneseve për shkak të frenimit të përhapjes së sëmundjes COVID-19, që shkakton koronavirusi i ri.
E për t’iu dalë në ndihmë qytetarëve nga të gjitha kategoritë shoqërore, Qeveria e Kosovës, me propozimin e Ministrisë së Financave dhe Transfereve, ka miratuar Pakon Emergjente Fiskale në vlerë prej 179,6 milionë euro, e cila duhet të zbatohet nga ATK-ja.
Cilat kategori do të përfitojnë nga kjo pako emergjente?
Sipas Ministrisë së Financave dhe Transfereve, fokusi i parë i masave të kësaj pakoje janë përfituesit e skemave sociale. Pra, përfitues janë të gjitha – skemat sociale, si rastet sociale, ata që mbesin pa punë, punëtorët që mbesin pa paga, etj.
Mandej janë bizneset private të cilat e kanë ndërprerë apo kufizuar veprimtarinë e tyre ekonomike gjatë masave të Qeverisë kundër COVID-19 do të jenë përfitues të pakos emergjente.
Do të përfitojnë edhe ata që janë në front të parë të përpjekjeve për të kontrolluar përhapjen e COVID-19, siç janë tafi mjekësor, Policia dhe Zjarrfikësit.
E përkundër faktit që masat e Qeverisë nuk kanë qenë të plota për marketet, furrat dhe barnatoret, Qeveria ka paraparë shpërblim edhe për punëtorët e këtyre sektorëve.
Qeveria ka parashikuar ndihmë edhe për ato kompani që kanë ruajtur fuqinë punëtore gjatë kësaj krize, dhe që fillojnë prodhimin e produkteve të reja apo që rrisin eksportet.
Po ashtu edhe komunat dhe pushteti lokal do të jenë përfitues të pakos emergjente të Qeverisë.
Përmes pakos së masave emergjente, Qeveria e Kosovës ka parashikuar një ndihmë edhe për komunitetet pakicë të vendit.
Sikurse në të gjitha fushat, pandemia COVID-19 ka vënë në pah edhe domosdoshmërinë e rritjes së prodhimit bujqësor dhe për të inkurajuar rritjen e kapaciteteve brenda vendit, Qeveria ka parashikuar të rrisë buxhetin për grante dhe subvencione në Ministrinë e Bujqësisë.
Qeveria ka parashikuar një ndihmë të vogël edhe për sektorin e kulturës dhe të sportit.
Por kur do të bëhet ekzekutimi i mjeteve – kryhen pagesat për gjithë këto kategori?
Zyrtarë nga Ministria e Financave dhe Transfereve kanë bërë me dije se për gjithë këto kategori, pagesat do të fillojnë në momentin e përfundimit të verifikimeve të nevojshme të aplikuesve.
Muharrem Shahini nga zyra e informimit të kësaj ministrie, ka thënë për FaktePlus se pagesat e pakos emergjente varet edhe nga dinamika e punës së komisioneve vlerësuese.
“Pagesat e pakos emergjente do të fillojnë të procedohen sapo të kryhen verifikimet e nevojshme. Kjo çështje varet nga dinamika e punës se komisioneve vlerësuese”, ka thënë Shahini.
Ministria e Financave sot ka bërë ekzekutimin e pagave për gjithë punëtorët e sektorit publik, duke përfshirë këtu edhe shtesën prej 300 eurove për kategoritë e caktuara të cilët po përballen me vijën e parë të frontit kundër COVID-19, siç janë stafi mjekësor, policët e zjarrfikësit.
Sa para janë në dispozicion
Por, për t’iu dalë në ndihmë bizneseve dhe kategorive tjera të shoqërisë, Qeveria e Kosovës, me propozimin e Ministrisë së Financave dhe Transfereve, ka miratuar Pakon Emergjente Fiskale në vlerë prej rreth 180 milionë euro, e cila duhet të zbatohet nga ATK-ja./InLajmi/
