Këshilltari i kryeministrit në detyrë Albin Kurti, Shkëlzen Gashi doli sot para mediave ku e kritikoi ftesën që mori nga Policia e Kosovës që të intervistohet për kanosje, lidhur me një postim të tij në Facebook ku ai bën thirrje për rezistencë.
Në një konferencë për media, Gashi ka tentuar ta sqarojë situatën, duke thënë se ai ka pasur fjalën për rezistencë paqësore
“Për sot ka pasur një ftesë për t’u intervistuar lidhur me një postim në rrjetet sociale. Më pastaj është hequr dorë. Unë më 19 prill ka qenë e diel, pas postimit të Grenell dhe Thaçit kam bërë një status në Facebook që e kam titullu “ne do të rezistojmë”. Për fat të mirë, menjëherë një qytetare ma ka shkru një pyetje përfundi këtij statusi “kush do të rezistojë, ndaj kujt dhe si”, përgjigja ime ka qenë që do të rezistojmë ne qytetarët e Kosovës ndaj politikës që po duan ta cënojnë vullnetin e qytetarëve. Më vjen shumë keq nëse ju keni prit rezistencë tjetër nga unë”, ka thënë ai.
Gashi ka thënë se pas postimit të bërë në Facebook, ai është kontaktuar nga ana e Policisë së Kosovës për t’u intervistuar në rolin e të dyshuarit.
“Dje kam marrë një thirrje nga Policia e Kosovës që kanë kërkuar të paraqitem menjëherë atje për një rast të kanosjes, unë e kam pyet kënd e kam kanosë, përgjigja e tij ka qenë që me një postim në Facebook ke bërë thirrje për rezistencë. Unë i kam thënë që smund të vij tash në polici sepse kam takim me kryeministrin. Unë kërkova ftesën të ma dërgojë të shtypur. Brenda 10 minutave ma kanë dërguar në shtëpi. Menjëherë ftesën e kam publikuar në Facebook, e pastaj është publikuar në media. Dje jam kontaktuar nga kabineti i kryeprokurorit, që më kanë thënë se ky rast nuk ka elemente të veprës penale”, ka thënë Gashi.
Madje, Gashi duke ndërhyrë në punët e drejtësisë, ka bërë thirrje që të ketë masa disiplinore ndaj policit që e thirri për intervistim dhe prokurores së rastit.
“Unë besoj, kërkoj dhe shpresoj që kryeprokurori do të marrë masa ndaj policit hetues, Ali Berisha dhe ndaj prokurores Nebahate Selimi. Kjo është shkelje e të drejtave të njeriut”, ka thënë Gashi.
