Të burgosurit dhe të paraburgosurit në burgun e Hajvalisë kanë përfunduar sot grevën e urisë. Ata kishin hyrë dje në grevë urie, si shenjë pakënaqësie ndaj refuzimit të kërkesave të tyre për lirim të menjëhershëm apo lirim të përkohshëm, përcjell InLajmi.
Lajmin e ka konfirmuar zëdhënësi i Shërbimit Korrektues të Kosovës, Florent Gashi.
“Grevën e urisë e kanë përfunduar mbrëmë. Të burgosurit kanë hequr dorë nga greva, sepse kërkesat e tyre janë adresuar te institucionet kompetente”, ka thënë Gashi.
Ndryshe, Këshilli për Mbrojtjen e të Drejtave dhe Lirive të Njeriut dje ka njoftuar se 40 të dënuar dhe dhjetëra të paraburgosur (janë solidarizuar me të dënuarit), nga data 20 prill 2020 kanë hyrë në grevë urie duke e refuzuar marrjen e ushqimit si revoltë dhe shprehje të pakënaqësisë që është refuzuar lirimi i tyre, qoftë i menjëhershëm apo edhe i përkohshëm./InLajmi/
