Kompania Rajonale e Ujësjellësit “Prishtina” ka sqaruar përmes një komunikate se faturat për shpenzimet e ujit dhe kanalizimit duhet të vazhdojnë të paguhen rregullisht.
“Konsumatorë të nderuar, si rrjedhojë e disa deklaratave jozyrtare nga persona jokompetent është krijuar një huti se a duhet të paguhen shpenzimet mujore të ujit në këtë gjendje pandemie. Deri më tash, Ujësjellësi Rajonal “Prishtina” nuk ka asnjë kërkesë zyrtare nga Qeveria e Republikës së Kosovës për mospagesë të shpenzimeve të ujit nga qytetarët”.
“Si rrjedhojë, kërkojmë nga ju që të vazhdoni të bëni pagesën e shpenzimit të ujit ngase këto do të i ndihmonin Ujësjellësit Prishtina që të ketë një likuiditet financiar dhe të vazhdojë të punojë për një furnizim të rregullt me ujë të pijshëm për të gjithë konsumatorët në zonën e shërbimit”.
KRU”Prishtina” ka njoftuar po ashtu se ka bërë disa rregullime në sistemin elektronik të pagesave ku secili konsumator mund të qaset përmes E-banking dhe të bëjë pagesën e faturës së ujit dhe kanalizimit.
“Jemi në konsultim me Ndërmarrjen Publike dhe Postën e Kosovës e cila do të ofrojë mundësinë që pagesat e ujit të bëhen edhe përmes arkave mobile të cilat do të vendosen në secilën komunë për ata konsumatorë të cilët nuk mund të kenë qasje në sistemin elektronik të pagesave për arsye të ndryshme”.
“Përfundimisht, Ujësjellësi Rajonal “Prishtina” u bën thirrje publike të gjithë konsumatorëve që sipas mundësive që kanë aktualisht të bëjnë shlyerjen e obligimeve mujore që të na mundësojnë një funksionim normal dhe një furnizim të rregullt me ujë të pijshëm. Bashkërisht për shërbime cilësore”. /InLajmi/
