Sipas një anketimi të kryer nga Gallup kanë treguar se presidenti amerikan, Donald Trump, ka pësuar rënie të mbështetjes në 43 për qind. Shkalla e mospajtimit popullor me punën e tij ka shkuar në 54 për qind, transmeton InLajmi.
Shkalla e aprovimit të punës së Trumpit në mesin e amerikanëve të anketuar ka pësuar rënie të theksuar krahasuar me 49 për qind sa e përkrahnin në mars, përderisa pakënaqësia është ngritur për 9 për qind, prej 45 për qind sa ishte muajin e kaluar, raporton televizioni CNN.
Presidenti amerikan është kritikuar së fundmi për mënyrën se si po menaxhon krizën shëndetësore në vend të shkaktuar nga virusi korona. Presidenti Trump kishte refuzuar fillimisht paralajmërimet për “virusin kinez”, sikur se i referohej, duke vlerësuar se ishte sajuar nga kinezët dhe se Shtetet e Bashkuara nuk kishin pse të merrnin masa radikale për të mbrojtur shëndetin publik.
Tani po përballet me kritika të guvernatorëve të shteteve amerikane që thonë se nuk kanë mbështetjen e mjaftueshme të Qeverisë federale.
Trumpi madje ka mbështetur me postime thirrjet për protesta kundër mbylljes së qyteteve që po luftojnë me virusin korona. Shtetet e Bashkuara prijnë me numrin e të infektuarve në botë. Më shumë se 22 milionë amerikanë kanë humbur vendet e punës prej se Qeveria nisi të merrte masa për të mbrojtur qytetarët./InLajmi/
