Donjet Bislimi, nënkryetari për rini i PDK-së, pas një bashkëbisedimi të zhvilluar me disa të rinj të Preshevës, është informuar se atje ka mungesë ushqimesh dhe barnash esenciale, shkruan InLajmi.
z. Bislimi edhe më herët ka bërë thirrje për Qeverinë e Kosovës që të mendojë për shqiptarët e Luginës, madje ka kërkuar që të shkoj atje si mjek vullnetar.
Ja postimi i z. Bislimi:
Sapo pata një bashkëbisedim me disa të rinj, studentë të mrekullueshëm, nga Presheva. Diskutuam rreth pandemisë dhe më informuan më shumë rreth gjendjes aktuale në Preshevë. Shumë qytetarë atje janë ndjerë të injoruar dhe kanë mungesë ushqimesh e barnash esenciale. Edhe më parë, i kam bërë thirrje Qeverisë sonë që të mendoj për shqiptarët e Luginës. Unë, si mjek i ri, kam kërkuar nga Qeveria të kërkojnë që unë së bashku me kolegët e mi të jemi mjekë vullnetarë atje. Përderisa institucionet tona pranuan 1000 teste nga Serbia, pse mos të lejohemi ne që të kontribojmë për vëllezërit tanë në Preshevë, Bujanoc e Medvegjë?! E tmerrshme që të pranohen teste nga Serbia, e ta lejojmë që shqiptarët atje të kenë mungesë testesh e neglizhim nga ana jonë. Duhet që sa më parë që Qeveria t’i kontaktoj përfaqësuesit shqiptarë dhe institucional atje dhe të diskutoj për shëndetin dhe mirëqenien e bashkëkombasve tanë. Në këtë sfidë të përbashkët, vetëm bashkë mund t’ia dalim./InLajmi/
