Ditëve të fundit dhuna në familje ishte e shtuar, madje për t’u ndaluar kjo bëri apel edhe Policia e Kosovës.
Siç duket mbyllja nëpër shtëpi si shkak i pandemisë COVID-19 po ndikon tek rritja e numrit të rasteve të dhunës në familje.
Lidhur me këtë ministrja e Drejtësisë, Albulena Haxhiu ka realizuar një video-mesazh ku tha se nëse jeni viktimë e dhunës, duhet raportuar atë.
“Qëndrimi në shtëpi, rritja e stresit dhe pasiguria, ka shënuar rritje të rasteve të raportuar të dhunës në familje kudo në botë, por edhe në Kosovë.Të jesh e mbyllur me abuzuesin është më keq se burg, sepse ata mund të përfitojnë nga situata e krijuar për të mos i lejuar partnerët të dalin jashtë dhe të kërkojnë ndihmë”, tha Haxhiu.
Tutje ajo theksoi se sikur në shtetet e tjera, edhe Kosova ka ndërmarrë masa emergjente, që të lehtësohet mënyra e raportimit, që të sigurohemi që strehimoret janë të përgatitura dhe njëkohësisht janë tre numra që përgjigjen 24 orë për ju.
“Dhuna në kohë pandemie është pandemi e fshehur, dhuna në familje është vepër penale, krim dhe ju siguroj që në këtë kohë panedemie dhunuesit do të ndëshkohen. Prandaj, vajza e gra raportoni dhunën kur ajo ndodhë ndaj jush apo ndaj fëmijëve. Është detyrë shtetërore t’i mbrojmë fëmijët, gratë e çdo qytetare e qytetar të tij”, shtoi ajo.
https://www.facebook.com/hapeporten/videos/3554948907909208/?t=0
