Anëtari i PDK-së Betim Gjoshi ka kritikuar kryeministrin në detyrë Albin Kurti duke thënë se po len anash Shqipërinë dhe Luginën e Preshevës, e po merret me Serbinë, përcjell InLajmi.
“Fatkeqësisht, sot në kohë pandemie, raportet mes Tiranës dhe Prishtinës zyrtare janë në pikën zero” ka shkruar ai në facebook.
Por, kështu nuk janë raportet me Beogradin zyrtar. Qeveria Kurti deri tani ka dhënë shembuj të bashkëpunimit pa asnjë problem me Qeverinë e Serbisë.
Postimi i tij i plotë:
ALBIN K. E KTHEN KOKËN NGA BEOGRADI DHE E HARRON SHQIPËRINË DHE LUGINËN E PRESHEVËS
“Vizitën e parë zyrtare do ta bëjë në Republikën e Shqipërisë” – thoshte kryeministri tash i shkarkuar Albin K.
Kështu u bë, shkoi, por të gjithë e mbajmë në mend vizitën konfliktuoze dhe përplasjet e panevojshme publike me kryeministrin Rama.
Çuditërisht ky bashkëpunim po bëhet pikërisht nga Albin K. dhe Vetëvendosje që e gjithë ekzistenca e tyre politike është falë fjalorit kundër Serbisë dhe falë fjalorit kundër çdo politikani që ka zhvilluar dialog të mbështetur ndërkombëtarisht.
Ky bashkëpunim nuk po zhvillohet në kushte të barabarta, pra mes dy shteteve. Në fakt, ajo që po bën Qeveria Kurti është vetëm zbatimi i vendimeve të Qeverisë së Serbisë brenda territorit të Republikës së Kosovës, duke cenuar integritetin territorial.
Sot Albin K. paska urdhëruar Ministrin Vitia që të bashkëbisedojë me kolegun e tij nga Qeveria e Serbisë. Deri tani ky lajm ka dalë nga palët e tjera, por Ministri Vitia deri tani ka heshtur. Ai vazhdon të hesht edhe më tej për marrëveshjen e fshehtë me Qeverinë e Serbisë për të lejuar mjekët nga Serbia dhe ekipet tjera mbështetëse të hyjnë në Kosovë.
Kjo Qeveri, Albin K. dhe Vetëvendosje gjithmonë janë ankuar se Prishtina dhe Tirana zyrtare nuk po interesohen dhe nuk po ndihmojnë shqiptarët në Luginën e Preshevës. Po sot kur janë në Qeveri? Asnjë fjalë të vetme as Albin K. dhe as Vetëvendosje nuk e kanë thënë për shqiptarët e Luginës së Preshevës. I kanë harruar dhe as nuk po i përmendin.
Albin K. nuk po i bën përshtypje as deklarata alarmuese e përfaqësuesve të shqiptarëeve të Luginës se “shqiptarët e Luginës së Preshevës janë në mëshirë të fatit dhe rrezikojnë katastrofën humanitare”.
Ai po hesht kur shqiptarët e Luginës kërkojnë ndihmën e Kosovës!
Ai po hesht sepse shqetësimi i tij në kohë pandemie është si të arrijë që edhe për ditët e mbetura të kap ndonjë bord për të emëruar ndonjë militant partiak./InLajmi/
