Kryetari i komunës, Zenun Elezaj, dje ka pranuar vendimin e Ministrisë së Shëndetësisë lidhur me orarin e ndalimit të qarkullimit të qytetarëve dhe automjeteve private.
Ky vendim për Komunën e Klinës, vazhdon orarin e njejtë të ndalim qarkullimit të qytetarëve dhe automjeteve private nga ora 17:00 pasdite deri në ora 06:00 të mëngjesit.
Kryetari Elezaj shpreh shqetësimin e tij në lidhje me rritjen e numrit të të diagnostifikuarve me virus dhe apelon qytetarët e komunës së Klinës që të respektojnë këtë vendim për ndalim qarkullimi, ndërsa kohën e lejimit të lëvizjes të mos lëvizin pa nevojë.
Kryetari Elezaj shpreh falënderim ndaj të gjithë qytetarëve të komunës së Klinës për bashkëpunim dhe vetëdisiplinën e treguar dhe kërkon që të respektohen udhëzimet e ekspertëve shëndetësor, duke shmangur daljet e pa nevojshme dhe kontaktet me persona të tjerë, në mënyrë që të përballojmë sa më lehtë këtë sfidë.
Komuna e Klinës deri më tani ka katër raste të konfirmuara me virusin COVID-19.
Pacientja zero, shtetasja italiane, e cila është konfirmuar si e shëruar dhe është kthyer ne Itali. Një rast nga karantina në Qendrën e Studentëve, i cili nuk ka pasur kontakt me persona të tjerë të komunës së Klinës. Dhe dy infermiere, njëra pjesë e stafit të Klinikës Infektive në QKUK, ndërsa rasti i fundit, qytetare e komunës së Klinës nga fshati Çabiq, infermiere në Spitalin Amerikan.
Kryetari Elezaj sqaron se, menjëherë pas konfirmimit të rastit, komuna ka kontaktuar me familjen e të infektuarës, të cilët janë udhëzuar në vetizolim, ndërsa do të ju bëhen edhe testet. Po ashtu, ka filluar hulumtimi i kontakteve të mundshme.
Pa panik, por me kujdesë.
