Zyrtari i Qeverisë së Serbisë në Kosovë Marko Gjuric, ka thënë se Shteti serb ka vendosur ndalimin e gjithë qarkullimit për vikend në veriun e Mitrovicës dhe Zveçanit, përcjell InLajmi.
Sipas vendimit të Qeverisë serbe në Mitrovicën e Veriut dhe në Zveçan s’do të lejohet fare të ketë lëvizje gjatë vikendeve.
“Nga 10 prilli është vendosur ndalim ditor i trafikut nga ora 12:00-06:00 në komunat e Mitrovicës së Veriut dhe Zveçanit për 14 ditët e ardhshme. Gjatë fundjavave është vendosur ndalim i përgjithshëm i trafikut”, ka njoftuar Gjuriç, në një postim në instagram.
Në raportin ditor për Kosovën, Gjuric ka thënë se janë 40 serbë që janë prekur me koronavirus, një ka vdekur. Të prekurit me COVID-19 janë nga Mitrovica e Veriut (22), Zveçan (10), Leposavic (4), Zubin Potok (3), Lipjan (1).
Gjuriç ka thënë se një pjesë e pacientëve janë vendosur në Serbi kurse pjesa tjetër në Qendrën Klinike në Veriun e Mitrovicës dhe në Qendrën e Studentëve të Mitrovicës së Veriut.
Ndërkohë, Gjuriç nuk ka dhënë asnjë shifër nëse ndonjëri prej pacientëve të komunitetit serb ndodhet në Qendrën Klinike Universitare të Kosovës.
Ndërkohë, në Kosovë, Ministria e Shëndetësisë ka marrë vendim për orën policore në Mitrovicën e Veriut dhe në Zveçan prej orës 12:00-6:00. Mirëpo, askund në vendim s’shkruan se do të ketë bllokim të gjithë qarkullimit gjatë vikendit.
Express ka siguruar vendimin e Ministrisë ku bëhen të ditura masat e ndërmarra për këto dy komuna të banuara me shumicë serbe. Askund s’është paraparë të bllokohet gjithë qarkullimi për vikend./InLajmi/
