Kryeministri në detyrë Albin Kurti vizitoi sot edhe komunën e Ferizajit ku u prit nga kryetari Agim Veli, duke lavduar qytetarët për respektimin e masave ndaj koronavirusit, përcjell InLajmi.
Kurti në këtë konferencë për media e ka pranuar se në pakon emergjente fiskale të qeverisë së Kosovës, nuk janë të përfshirë gazetarët, me ç’rast ai ka thënë se një gjë e tillë do të ndodhë në një adresim të radhës nga qeveria.
“Ne i kemi mbështetur të gjitha llojet e uniformave që janë në detyrë në këtë luftë të përbashkët. Pakoja fiskale dhe emergjente është ciklike, është për këtë muaj dhe muajin tjetër, e eventualisht edhe për një muaj tjetër. Pajtohem që duhet ta adresojmë këtë çështje, në mënyrë që edhe ata që nuk i kemi përfshirë, t’i përfshijmë”, ka thënë ai.
Kurti tutje ka thënë se masat që janë marrë nga komuna e Ferizajt, kanë ndikuar në numrin e vogël të të infektuarve me koronavirus në këtë komunë.
“Ne e falënderojmë kryetarin e komunës, Agim Aliun për mikpritjen dhe angazhimin e tij në luftën e përbashkët kundër koronavirusit. Masat që janë marrë në Ferizaj sigurisht që kanë ndikuar që numri i të infektuarve të jetë i ulët, dhe sigurisht që këto masa duhet të vazhdojnë. U njoftova edhe për gjendjen në spitalin regjional të Ferizajt dhe punën që po bëhet në QKMF-të. Qeveria në detyrë ka aprovuar një masë shumë të rëndësishme në formën e një pakoje fiskale emergjente, ku kujdesemi për ata që janë të varfër, për ata që punojnë, dhe për ata që janë të rrezikuar teksa punojnë, por kujdesemi edhe për bizneset”, tha ai.
Kurti tha po ashtu se qytetarët nuk mund të llogarisin më shumë në shërim sesa parandalim, për shkak se sipas tij, shëndetësia publike në Kosovë lë shumë për të dëshiruar.
“Në kuadër të masave, janë paraparë ndihmat për komunat si dhe për ndërmarrjet publike që kanë probleme për likuiditet. Në këtë krizë nuk duhet ta humbin normalitetin. Në prill duhet të përqëndrohemi në udhëzimet kryesore, rrini në shtëpi, rrini të pastër dhe në distancë. Sektori i shëndetësisë publike nuk është i nivelit të kënaqshëm, andaj duhet të llogarisim më shumë në parandalim se sa në shërim. Në muajin prill duhet t’i respektojmë vendimet e qeverisë në detyrë dhe këshillat e ekspertëve. Siç nuk po na dallon virusi, nuk duhet të dallojmë as ne në luftën e koronavirusit”, tha ai./InLajmi/
