“Është e vështirë të imagjinohet se sa e mërzitshme mund të jetë jeta martesore dhe sa të kota janë përpjekjet për ta mbajtur në këmbë një martesë të pashpresë, përcjell InLajmi.
Vështirë të imagjinohet se sa patetikë bëhen njerëzit kur bie fjala për dashurinë, se si ankohen dhe u shmangen disa të vërtetave, se si ngecen në vendnumëro në jetën e tyre dhe, të mbytur nga keqardhja për veten, kapen pas emocioneve të përjetuara në të shkuarën.” – shkruhet në një fragment të librit “Kam shumë për të thënë” (Op te hoogte) të Christophe Van Gerrewey.
Me fjalë të përgjithshme, një burrë, i cili ka humbur dashurinë, kërkon ende të flasë me ish-të dashurën. Kështu vendos t’i shkruajë një letër, që përfundon më vonë në roman.
Ndonëse në fillim niset si një letër e zakonshme, pak e nga pak dërguesi dhe marrësi i letrës shkëputen nga autori dhe marrin një tjetër dimension.
“Kam shumë për të thënë” fitoi Çmimin e Debutuesve në vitin 2014, në Belgjikë, si dhe arriti ndër finalistët e disa çmimeve letrare belge. Në vitin 2016, fitoi Çmimin Europian për Letërsinë./InLajmi/
