Ish-ministri i shëndetësisë Uran Ismaili ka reaguar pasi që Gjykata Kushtetuese e pezulloi deri me 30 qershor hyrjen në fuqi të ligjit të ri për rritje pagash, shkruan InLajmi.
Ismaili ka thënë se mosngritja e pagave për mjekët dhe infermierët tanë është tejet zhgënjyese.
Ai ka thënë se profesionistët shëndetësorë janë vija jonë e parë e frontit në luftën kundër Covid-19, ndërkohë që kjo qeveri nuk ofron asgjë tjetër, pos shtesave të përkohshme.
Postimi i plotë pa ndërhyrje:
Pritja e tyre shumë vjeçare ende nuk ka marrë mbështetjen e merituar. Ligji që bëri ngritjen më të lartë të pagave ishte mirëpritur nga profesionistët shëndetësorë si një hap i madh drejt trajtimit dinjitoz të tyre nga Republika e Kosovës.
Mirëpo opozita e atëhershme, pra Qeveria e sotme, nuk e votuan këtë ligj dhe dëshmuan se nuk arrijnë të dalin përtej agjendës së tyre partiake, as kur bëhet fjalë për rritjen e mirëqenies qytetare. LVV dhe LDK në opozitë nuk e votuan ligjin, ndërkohë në pushtet nuk i përfshinë rritjet e pagave në Ligjin e Buxhetit.
Profesionistët shëndetësorë janë vija jonë e parë e frontit në luftën kundër Covid-19, ndërkohë që kjo qeveri nuk ofron asgjë tjetër, pos shtesave të përkohshme. Shtesat janë improvizime të pamjaftueshme, kurse shteti ynë ka nevojë për plane të qëndrueshme e afatgjate.
Për dy vite gjatë mandatit tim si Ministër i Shëndetësisë kemi punuar me përkushtim për të përmirësuar sistemin shëndetësor dhe për të rritur mirëqenien e profesionistëve shëndetësorë që t’u sigurojmë atyre paga të dinjitetshme që të qëndrojnë në Kosovë.
I bëj thirrje Gjykatës Kushtetuese që këtë lëndë ta trajtojë me urgjencën më të lartë, marrë parasysh përballjen me pandeminë globale. Masat e përkohshme stimuluese të ndërmarra nga Qeveria janë harrnime që pamundësojnë ndërtimin e një sistemi shëndetësor që kujdeset për shëndetin e qytetarëve. Pengesat politike nga agjendat partiake kanë lënë profesionistët tanë shëndetësorë në vija të frontit pa siguri financiare dhe pa mirëqenie./InLajmi/
