Partia Demokratike e Kosovës, Dega në Fushë Kosovë ka shprehur shqetësim në lidhje me mbeturinat që nuk po hiqen, shkruan InLajmi.
Në reagimin e tyre në facebook thuhet se ai pse Komuna e dezinfektoi qytetin, mbeturinat po kundërmojnë në tërë qyetin dhe kjo mund të sjellë pasoja në përhapje të infeksioneve.
“Komuna në fakt, pjesërisht ka bërë dezinfektimin e qytetit, kurse në vendbanime rurale nuk ka intervenuar, sikurse as në shumë hyrje ndërtesash ashtu siç ka deklaruar.”
Postimi plotë i PDK-së Fushë Kosovë
Komuna “dezinfekton” Fushë Kosovën, por nuk i heq mbeturinat.
Mbeturinat gjithandej qytetit të Fushë Kosovës, janë tregues i punës që po bën komuna edhe në këto ditë të përballjes me pandeminë Covid 19.
Komuna vazhdimisht po deklaron se është duke dezinfektuar rrugët, por mbeturinat nuk po hiqen!
Mbeturinat këto ditë mund të jenë dyfish potencial i rrezikshmërisë për përhapje të infeksioneve.
Qytetarët nga shumë lagje, kanë dërguar foto gjatë tërë ditës së diel, për të dëshmuar se sa e pa përkushtuar është komuna për të mbajtur larg qytetarëve infeksionet dhe coronavirusin.
Komuna në fakt, pjesërisht ka bërë dezinfektimin e qytetit, kurse në vendbanime rurale nuk ka intervenuar, sikurse as në shumë hyrje ndërtesash ashtu siç ka deklaruar.
Por, si mund të jetë i dezinfektuar një qytet me kaq shumë papastërti?
Fatmirësisht, në Fushë Kosovë, nuk ka ende asnjë rast të konfirmuar me coronavirus, megjithatë komuna po tregohet neglizhente për të vepruar më me urgjencë përballë kësaj situate.
Me fotografi në faqe interneti dhe deklarata, nuk mund t’i hedhni hi syve qytetarëve.
Fotot që po i postojmë tregojnë se sa të papërgjegjshëm jeni!
