Asociacioni i Gazetarëve të Kosovës, me shqetësim ka pranuar njoftimin për tentim-sulmin ndaj gazetarit Berat Buzhala. Ai përmes një postimi në llogarinë e tij në Facebook, ka treguar se gjatë ditës së djeshme, në Prishtinë, dy persona kanë tentuar ta sulmonin fizikisht.
“Meqë andej pari ka shumë kamera, meqë kam fakte që kundër meje po përgatitej një sulm, unë këtë rast nesër e çoj në polici” – ka shkruar ndër të tjera Buzhala.
Pas pranimit të informatave për këtë rast, AGK njofton se ka kontaktuar autoritetet për të marrë përgjigje zyrtare. Policia e Kosovës, në përgjigjen drejtuar AGK-së, ka bërë të ditur se është duke proceduar rastin dhe të gjitha veprimet hetimore janë në proces sipas procedurave ligjore dhe në konsultim me prokurorin kompetent.
“Duke e konsideruar këtë akt të papranueshëm, AGK kërkon nga Policia e Kosovës dhe të gjithë ata që janë të thirrur për të mbrojtur dhe ruajtur rendin e ligjin, hetim të menjëhershëm që kryerësit e kësaj vepre të dalin sa më parë para drejtësisë”, thuhet në komunikatën e AGK-së.
