Ministri i Shëndetësisë, Arben Vitia ka folur në një konferencë për media rreth situatës së koronavirusit në Kosovë.
Vitia tha se në Kosovë janë aktualisht 142 respiratorë dhe janë porositur edhe 50 të tjerë që pritet të arrijnë në Kosovë në prill dhe maj.
Më tutje, ai njoftoi se së shpejti do të vijnë në Kosovë edhe dozat e para të klorikinës.
“Sot jemi këtu që të bëjmë edhe një adresim përveç dy pjesve që do t’iu informoj, pjesa tjetër do të jetë kërkesë që të veproni me seriozitetin maksimal që ti ndihmoni institucionet në luftën kundër COVID19. Përtej masave që kemi ndërmarrë deri më tani, dua të ju informoj se në Kosovë janë 142 respiratorë dhe kemi porositur blerjen e 50 respiratorëve të rinjë që priten të vijnë në Prill dhe Maj. Brenda pak ditësh do t’i kemi dozat e para të produktit klorikinë, por akoma nuk ka bari që është treguar i suksesshëm në trajtimin e kësaj sëmundje. Ne do të bëjmë gjithçka që është nëd orën tonë që këtë situatë ta trajtojmë në mënyrën më të mirë.”, tha Vitia.
Vitia tha që dy javët e ardhshme janë vendimtare për luftën kundër Koronavirusit në Kosovë dhe ka bërë thirrje tek qytetarët t’i bashkohen luftës kundër koronavirusit me disiplinë personale dhe higjenë.
“Ne nuk kemi sigurinë që as respiratorët e as terapia do ta bëjnë të vetën, por sot jemi këtu të tregojmë që të gjitha masat do të jenë të kota, nëse qytetarët nuk i respektojnë masat e qeverisë dhe rekomandimet e IKSHPK dhe Ministrisë së Shëndetësisë. Dy javët e ardhshme janë vendimtare për luftën tonë, nëse jemi në krye të detyrës do ta kalojmë këtë situatë me sa më pak pasoja. Kemi dy shembuj, neglizhencën dhe reagimin e shpejtë nëpër shtete të ndryshme. Prandaj, qytetarë të dashur është momenti i fundit të bëhemi bashkë në këtë situatë pasi nuk ka askund në botë as ilaq për shërim e as vaksinë për parandalim dhe arma e vetme që e kemi është kujdesi, solidariteti dhe diciplina. Krejt çfarë mund të bëni është të rrini në shtëpi sepse kështu mbroni shëndetin e të gjithëve.”, tha ministri Vitia.
Më tutje, Vitia është shprehur se në Kosovë duhet të vijnë vetëm ata që kanë raste urgjente, ndërsa të karantinuarit në Qendrën e Studentëve i ka lutur për durim.
“Fatin e përballjes e kemi të gjithë në fatin e duarve tona. Nga sot secili nga ne duhet t’i bashkohemi mantilbardhëve në luftën kundër koronavirusit. Rrini në shtëpi, mbani higjenën personale dhe familjare, mbani distancë sociale. Ju bëj thirrje komunave të zbatojnë masat e qeverisë në të gjitha masat. Kisha një adresim të veçantë për personat në karantinë. Lufta me COVID19 mund të përballohet me më pak humbje me kontributin e të gjithë neve. Jemi të vetëdijshëm se kushtet aty nuk janë më të mirat, por do të punojmë në ngritjen e higjenës. Por ju lutëm të jeni të vetëdijshëm se kushtet aty janë në nivel më të mirë se disa shtete ku karantinat janë bërë në tenda. Ju lutem, të mirëkuptoni këtë situatë emergjente dhe sakrifica që po bëni është për të mirën e përgjithshme. Për shkak të kapaciteteve të kufizuara të karantimit dhe në mënyrë të mos rrezikoni shëndetin tuaj dhe të tjerve, iu bëj thirrje bashkëatdhetarëve tonë që vetëm në raste urgjente të kthehen në Kosovë. Ju lutem rrini në shtëpi, aty është siguria dhe fitorja jonë e përbashkët. Polici nuk është anti-virus e as ushtaraku nuk është vaksinë dhe personeli shëndetësor nuk është imun ndaj virusit.”, tha Vitia.
