Ish-Ministri I Shëndëtësisë Uran Ismaili ka thënë se me të drejtë, qytetarët e indinjuar dolën në ballkonet e tyre për të protestuar me kërcitje enësh kundër klasës politike, shkruan InLajmi.
Ismaili në rrjetin social facebook ka thënë se se ky veprim do të bië në vesh të shurdhër te klasa politike, ngase ngase, Qeveria po bie nga vetë Qeveria. Askush nuk mund ta mbrojë tjetrin nga vetja e tij.
“Shumica parlamentare është bazë për ta mbajtur Qeverinë. Nëse vetë, me duart tua, shkul një pjesë të kësaj shumice, është matematika më e thjeshtë në demokraci, është rruga kur dëshirohet të rrëzohet Qeveria. Ende është e paqartë, për të gjithë qytetarët, ata që votuan për këtë koalicion qeverisës dhe ata që nuk votuan për të, se si është e mundur që në javën kur Qeveria mbylli shkollat dhe ndali arsimimin e fëmijëve, kur mijëra punëtorë dhe biznese e ndalën punën e tyre, në javën kur filloi ankthi i ballafaqimit me pandeminë e coronavirusit, Albin Kurti shkarkoi për një fjalë goje Ministrin e Brendshëm, që është edhe Nënkryetari i parë LDK-së, dhe e sfidoi LDK-në: Me mua apo me Agimin, për ta provokuar kështu rrëzimin e Qeverisë?”
Më tej ISmaili thotë se Albin Kurti flet për unitet, ndërsa vepron si përçarësi më i madh.
“Sot e gjeti të shkonte në Ministrinë e Agim Veliut dhe të demonstronte me Xhelal Sveçlën se gjithçka është në rregull. Pra, ta fuste gishtin në plagën e LDK-së. Të sigurohej se po e forconte edhe më tutje idenë e rrëzimit të Qeverisë. Sepse, ky është qëllimi i tij”.
Ai ka thënë se e vërteta është se Kurti e dizajnoi vetë largimin e tij, siç e quajti ai – “në një situatë të pazakonshme, që ne nuk e kemi hasur një të tillë, si Qeveri e Legjislaturë, që prej çlirimit e këndej”, ngase ballafaqimi me të – do të dëshmonte se nuk është i gatshëm të përballej as me luftën kundër COVID-19, as me SHBA-në mike, e as me Serbinë armike. /InLajmi/
