Lideri i Partisë Demokratike Kadri Veseli thotë se situata e krijuar nga pandemia Covid 19 është shumë komplekse dhe do të ketë masa shumëdimensionale, shkruan InLajmi.
Shumë ndërmarrës, puntorë, prodhues, hoteleri, tregti nëse nuk ndihmohen me një plan të qartë mund të demtohen rëndë nga injorimi i Qeverisë së Kosovës. Sipas tij qeveria nuk po e kupton rolin e saj në këtë gjendje të jashtëzakonshme dhe në këtë situatë përveçse kemi pasoja momentale do të kemi dhe pasoja afatgjate. Edhe Qeveria jonë, edhe Kryeministri, duhet ta kuptojnë se kjo është detyra e tyre para qytetarëve. Ekonomia dhe bizneset e vendit tonë nuk duhen injoruar, nuk duhen harruar, nuk duhet lënë pa ide dhe vendimmarrje në këtë situatë, siç po ndodh aktualisht. Kjo Qeveri dhe ky Kryeministër duhet të punojnë mirë dhe mençur, e të mos e rrezikojnë vendin thotë ai ndër të tjera në një postim të tijin në facebook.
Postimi i plotë:
Situata e krijuar nga pandemia në vendin tonë është shumë komplekse dhe do të ketë konsekuenca shumëdimensionale.
Për fat të keq, Qeveria nuk po mund ta kuptojë rolin e vet në këtë gjendje të jashtëzakonshme.
Në këtë situatë në të cilën jemi, Kosova, pos pasojave momentale, do t’i ketë edhe pasojat afatgjate për të ardhmen, në kontekstin ekonomik dhe politik.
Shumë ndërmarrës, punëtorë, prodhues, hotelieri, tregti, nëse lihen kështu si deri më sot dhe nuk ndihmohen me një plan të qartë, të shpejtë dhe konkret, mund të dëmtohen rëndë nga ky injorim i Qeverisë së Kosovës.
Shtetet e fuqishme menjëherë kanë fokusuar programet e tyre qeverisëse në parandalimin dhe sanimin e këtyre pasojave fatale për ekonominë dhe shtetin e tyre në të ardhmen.
Edhe Qeveria jonë, edhe Kryeministri, duhet ta kuptojnë se kjo është detyra e tyre para qytetarëve. Ekonomia dhe bizneset e vendit tonë nuk duhen injoruar, nuk duhen harruar, nuk duhet lënë pa ide dhe vendimmarrje në këtë situatë, siç po ndodh aktualisht.
Po ashtu, në kontekstin politik, një çështje tejet e rëndësishme nuk duhet të mbetet jashtë vëmendjes: raportet tona me SHBA-të. Antiamerikanizmi i Qeverisë Kurti po i shkatërron këto marrëdhënie dhe po i largon investitorët amerikanë nga Kosova. Kjo mund të jetë me pasoja shumë më të rënda e më të mëdha sesa Coronavirusi. Sidomos tash, kur na është bërë e ditur sa vlen ndihma e miqve në kohë të vështira.
Kjo Qeveri dhe ky Kryeministër duhet të punojnë mirë dhe mençur, e të mos e rrezikojnë vendin. /InLajmi/
