Në vendin tonë ende nuk është shënuar asnjë rast me koronavirus, por përkundër kësaj qytetarët kanë filluar të ndërmarrin masa në rast se do të detyrohen të izolohen nëpër shtëpi. Blerje të shumta të produkteve ushqimore dhe atyre higjienike po bëhet anembanë vendit, e më shumë në Prishtinë. Këtë gjendje paniku janë duke e shfrytëzuar më së shumti bizneset, të cilët edhe kanë rritur çmimet e produkteve.
Tashmë thuajse të gjitha vendet e rajonit janë prekur dhe kanë konfirmuar rastet e para me koronavirus.
E ndonëse në Kosovë nuk ka ende ndonjë rast të konfirmuar, rastet e paraqitura në vendet fqinje kanë ngritur alarmin edhe për institucionet tona.
Madje, Qeveria e Kosovës i ka rritur kapacitetet për të reaguar ndaj këtij virusi vdekjeprurës dhe në mbledhjen e saj i ka ndarë 10 milionë e 13 mijë euro për mbrojtje dhe mori 11 masa konkrete, duke ndërprerë mësimin e pezulluar shumë aktivitete.
Gjendja me të cilën po përballen vendet tjera ka alarmuar qytetarët, të cilët ditëve të fundit janë duke blerë me të madhe artikuj ushqimor e higjienik. Madje, marketet në Prishtinë mbrëmë janë zbrazë nga blerjet e shumta.
E me të nis blerja e madhe edhe kanë nisur të ngritën çmimet e shumicës së artikujve të kërkuar dhe për këtë është raportuar disa herë deri më tash.
Një prej bizneseve të mëdha që ka pesëfishuar shitjen këtyre ditëve është edhe rrjeti i marketeve ETC dhe ELKOS, që për pronar e ka Ramiz Kelmendin.
Vetë Kelemdi ka folur për raportimet dhe shqetësimet që kanë ngritur qytetarët për rritjen e çmimeve që janë bërë ditëve të fundit Kosovës.
Ai në një deklaratë për FaktePlus ka thënë se nuk duhet të bëhet panik kaq e madhe, pasi gjendja nuk është ashtu siç po paraqitet.
“Nuk duhet të behët panik tek qytetarët. Nuk është gjendja aq alarmante”, ka thënë Kelmendi.
Ai ka thënë se në marketet e tij çmimi nuk është ngritur.
Por, nuk e përjashton mundësinë që kjo të ndodh, pasi siç thotë ai, çmimi i produkteve varet edhe nga furnitorët.
“Unë ju flas me bindje te plotë se në ETC dhe në ELKOS nuk ka luhatje të çmimeve. Nuk ka asnjë ngritje të çmimeve dhe nuk do të ketë derisa kjo nuk bëhet edhe nga kompanitë furnizuese. Nëse ato fillojnë të luajnë me çmime edhe ne nuk kemi si të mbrohemi”, ka thënë ai.
Kelmendi tutje ka thënë se e mbështet edhe vendimin e Qeverisë së Kosovës që të gjobiten marktetet që rrisin çmimet.
“Qeveria e Kosovës mirë që i ka nxjerr këto vendime dhe këtë thirrje. Uroj që ato të zbatohen. Unë i mbështes këto vendime dhe jam që të dënohen bizneset që shfrytëzojnë këto kohë për ngritje të çmimeve”.
Pronari i ETC ka treguar se blerja nga ana e qytetarëve është rritur për 5 herë më shumë.
“Ka rritje të madhe të blerjeve. Kjo është rritur për 5 herë”, ka thënë Kelmendi, duke treguar se aktualisht nuk ka mungesë të asnjë produkti dhe sipas tij nuk duhet të bëhet panik për këtë çështje.
Kujtojmë se Qeveria e Kosovës ka marrë një serë vendimesh si masë mbrojtëse ndaj koronavirusit dhe ka theksuar që këtë situatë nuk mund ta shfrytëzojnë bizneset për të përfituar.
Pas situatës së krijuar lidhur me çmimet, ministri i Financave, Besnik Bislimi ka vizituar sot Administratën Tatimore të Kosovës ku kërkoi masa rigoroze ndaj bizneseve të cilët keqpërdorin këtë situatë.
Por nga ATK tashmë është bërë publik një numër kontaktues ku qytetarët mund të njoftojnë për ngritjen e çmimeve në dyqane apo barnatore.
Me të marrë informatën, ATK do të dërgojë ekipin në vendin e ngjarjes, ku edhe do të ketë dënime të mëdha për keqpërdoruesit.
NJOFTIM
Lajmëroni këtë numër për ngritjen e çmimeve në dyqane ose barnatore; 0800 80 800.
ATK-ja dërgon ekipin në vendin e ngjarjes dhe do të pësojnë dënime të mëdha”.
