Këshilli Protestues i Trepçës ka paralajmëruar protesta më radikale duke filluar nga e hëna.
Kjo për arsye se ata po kërkojnë anulimin e konkursit të shpallur me datë 24 gusht.
Arsim Musa nga ky këshill ka thënë për Klan Kosovën se Qeveria ose ministria përkatëse e ka caktuar bordin e ri, por sipas tij, në bordin e ri ka edhe anëtarë të bordit të kaluar.
Sipas tij, Shyqri Sadiku i cili ka qenë në bordin e kaluar dhe që është pjesë edhe e bordit të ri, është i akuzuar për korrupsion.
Klan Kosova e ka kontaktuar edhe Shyqri Sadikun për ta pyetur rreth kësaj akuze, dhe ai ka thënë se për një gjë të tillë adresa është në Prokurori.
“Ato akuza kanë qenë të mëhershme. Për ato është adresa në Prokurori dhe unë nuk merrem me to. As nuk kam shpallur konkurs, as nuk kam qenë në komision dhe as nuk merrem me këtë punë. Unë i përfaqësoj punëtorët që janë përbrenda marrëdhënieve të punës si aksionar”, shkruan Klan Kosova.
“Po jam pjesë e bordit të ri. Unë nuk e njoh atë [Arsim Musën] dhe nuk më lidh asgjë me të. Kjo është e pakuptimtë për mua dhe nuk e di se për çfarë arsye ai është i pakënaqur. Unë nuk kam pasur asnjë ndikim”.
