Kryetari i Aleancës për Ardhmërinë e Kosovës, Ramush Haradinaj, ka reaguar pas vendimit të ministrit të Infrastrukturës dhe Ambientit, Lumir Abdixhiku, i cili ka shfuqizuar vendimin e marr nga Qeveria Haradinaj që ia mundësonte Bechtel Enka-s edhe 50 milionë euro shtesë për ndërtimin e dy kyçeve dhe një mbikalimi në autostradën “Arbën Xhaferi”.
Haradinaj ka thënë se ky vendim i ministrit Abdixhiku është mashtrim i radhës i Qeverisë Kurti.
“Për hirë të korrektësisë dhe me misionin që të tregohet e vërteta, sot Qeveria e Mashtrimit anuloi një vendim-autorizim për Ministrinë e linjës që të negociojë për kyçjet në Ferizaj dhe Viti. Në vendimin e Qeverisë që unë kam drejtuar nuk ceket shuma”, ka shkruar Haradinaj në rrjetin social Facebook.
Postimi i plotë:
Mashtrimi i radhës i Qeverisë Kurti
Sot, duke manipuluar me shifra dhe duke trumbetuar për anulimin e kinse 50 milionëve për Bechtel Enka-n, Qeveria Kurti u mundua që të mashtrojë qytetarët se shpëtoi buxhetin.
Për hirë të korrektësisë dhe me misionin që të tregohet e vërteta, sot Qeveria e Mashtrimit anuloi një vendim-autorizim për Ministrinë e linjës që të negociojë për kyçjet në Ferizaj dhe Viti. Në vendimin e Qeverisë që unë kam drejtuar nuk ceket shuma.
Qytetarë të nderuar,
Qeveria e Mashtrimit nuk anuloi 50 milionë por anuloi vendimin që kishte për qëllim kyçjen e Ferizajit dhe Vitisë, si dhe mbikalimin e Paklenicës me Autostradën “Arbën Xhaferi.” Qeveria e Mashtrimit u mundua të na hedhë hi syve duke përdorur shifra për të anuluar një autorizim. RH /InLajmi/
