Përhapja masive e epidemisë së koronavirusit e ka çuar çmimin e naftës së papërpunuar në nivelin më të ulët në 31 muajt e fundit. Kjo ka ndodhur pikërisht në javën kur investitorët presin takimin e rëndësishëm të OPEC-ut që do të mbahet në Vjenë.
Epidemia e koronavirusit e ka çuar çmimin e naftës së papërpunuar në nivelin më të ulët në 31 muajt e fundit, pikërisht në javën kur investitorët presin takimin e rëndësishëm të OPEC-ut që do të mbahet në Vjenë.
Mirëpo, duke qenë se në Kosovë nuk ka ende asnjë rast të konfirmuar me këtë virus, rrjedhimisht nuk ka pasur as lëvizje të çmimeve të naftës.
Këtë për lajmi.net e konfirmon edhe Kryetari i Shoqatës së Naftarëve, Fadil Berjani.
Ai thotë se çmimi përcakotohet nga organizatat OPEC dhe BERZH, teksa nëse ka prodhim të madh të këtij derivati, atëherë automatikisht çmimi bie.
Por, një gjë e tillë nuk ka ndodhur në Kosovë.
“Sa i përket virusit që është i shpërndarë në botë, nuk mund të ketë ky virus ndikim në uljen ose ngritjen e çmimit të naftës. Pra organizata OPEC dhe BERZH e përcakton çmimin. Nëse ka prodhim më të madh në organizatën OPEC, atëherë çmimi mbetet më i ulët. Mirëpo për momentin, që një muaj ditë mund ta them lirisht se çmimet janë standarde, ku në BERZH ka lëvizje shumë të vogla. Rast konkret kemi pasur rastin në Kosovë, kur çmimi në import është rrit, mirëpo me pakicë nuk është rrit”, ka thënë ai.
Sipas Berjanit, lëvizja e njerëzve në Kosovë është normale, dhe në këtë formë s’ka pasur as ndryshim të çmimit.
“Lëvizja e njerëzve në Kosovë është normale, siç ka qenë para dy muaj dite, dhe nuk mendoj që ky virus ka ndikim në Kosovë për shkak se ende nuk ka asnjë rast dhe s’ka ndryshim të lëvizjeve”, thotë Berjani
Kosova fatmirësisht nuk është prekur ende nga virusi që u përhap me të madhe fillimisht nga shteti i Kinës. Në lidhje me këtë, Kosova ka shtrënguar masat pikë së pari në pikat kufitare, atje ku po ndalohet importi i çdo produkti nga Kina që mund ta bartë virusin në fjalë.
“Republika e Kosovës, nuk importon produkte ushqimore nga Kina, të cilat potencialisht konsiderohen si lëndë përmes të cilave mund të bartet virusi, njëkohësisht nuk kemi importe të kafshëve të gjalla. I vetmi import ka qenë ushqimi për bletë dhe hojet e bletëve, të cilat i kemi ndaluar menjëherë për import. E kjo padyshim, që na ndihmon që ne t’i shmangemi rrezikut direkt nga vendi i origjinës së virusit, pra nga Kina”, ka thënë Lamir Thaçi nga Agjencia e Ushqimit dhe Veterinarisë për lajmi.net.
Nga AUV thonë se janë duke përcjellë me seriozitet situatën dhe të dhënat e OBSH-së, dhe Komisionit Evropian lidhur me ushqimin dhe tregtinë.
Thaçi thekson se AUV është i gatshëm që në çdo kohë të vihen në veprim me të gjitha kapacitetet që ata kanë.
“Gjithsesi, AUV përveç pjesëmarrjes së rregullt në komitetin e krijuar nga Ministria e Shëndetësisë, është duke përcjellë me seriozitet situatën dhe të dhënat e OBSH, Komisionit Evropian dhe EUCD-së lidhur me ushqimin dhe tregtimin e tij. Ne, si autoriteti më i lartë për ushqim dhe veterinari, jemi të gatshëm që në çdo kohë, më të gjitha kapacitetet që kemi të vihemi në dispozicion për të vepruar, për parandalimin e këtij virusi në vendin tonë. Të gjitha rekomandimet që dalin nga Organizata Botërore e Shëndetësisë (OBSH) dhe Qendra e Kontrollit të Sëmundjeve (ECDC), jemi të përgatitur që t’i aplikojmë në pjesën që i takon kompetencave tona si Agjenci, sikurse të gjitha vendet, të cilat inkurajohen të vazhdojnë të forcojnë gatishmërinë e tyre për emergjencat shëndetësore në përputhje me Rregulloren Ndërkombëtare të Shëndetit (2005)”, thotë ai.
Ndërkaq, gati çdo ditë në Kosovë paraqiten raste të reja të dyshuara me koronavirus në Kosovë, por që deri tani fatmirësisht janë negative.
Vendet e rajonit në të cilat deri më tani janë konfirmuar raste me koronavirus janë Maqedonia e Veriut dhe Kroacia.
