Të hënën në Kuvendin e Kosoëvs u mbajtë seancë e jashtëzakonshme ku u diskutua për taksën 100 për qind ndaj produkteve serbe.
Gjatë kësaj seance për çështjen në fjalë u prononcuan pothuajse të gjithë deputetët. Në deklaratat e tyre u pa qartë se asnjëra nga partitë nuk kanë qëndrime të njëjta.
Partia Demokratike e Kosovës po kërkon pezullim e taksës për 120 ditë, ashtu edhe siç e kishte planifikuar kryetari i kësaj partie, Kadri Veseli sa ishte pjesë e qeverisë. Deputetë të PDK-së u shprehën kundër propozimit të kryeministrit, Albin Kurti për ta hequr taksën pjesërisht.
Plotësisht kundër heqjes së taksës, u deklarua Grupi Parlamentar i Aleancës për Ardhmërinë e Kosovës. Madje, kundërshtimin e tyre ata e domonstruan me disa pankarata në të cilat kishin vendosur slogane ku thuhej ‘Serbia nuk kalon’ dhe ‘Ku është kërkim falja, ku janë të pagjeturit’.
Kjo parti paralajmëroi se do të ndërmarrë edhe aksione tjera për të kundërshtuar heqjen e taksës, e cila u vendos në nëntor të 2019-ës sa ishte kryeministër lideri i tyre, Ramush Haradinaj.
Nga deklarata e liderit të Nismës Socialdemokrate, Fatmir Limaj u kuptua se edhe partia e tij është kundër heqjes së taksës, përderisa ky i fundit pati një mori kritikash ndaj Kurtit për shumë çështje.
Në pozitë më të vështirë ndodhet koaliconi VV-LDK të cilët tani e kanë në dorë vendimin për heqjen e taksës.
Nga Lidhja Demokratike u tha se janë pro heqjes së taksës pasi ky vendim do i hapte rrugë dialogut Kosovë-Serbi. Arben Gashi nga kjo parti deklaroi se LDK ishte kundër taksës qysh në fillim, madje edhe gjatë fushatës zgjedhore e ka mbrojtur këtë qëndrim. Por, si duket LDK harroi që kanë qenë edhe pro vendosjes së reciprocitetit, për të cilin ishin marrë vesh me VV-në.
Kryeministri, Albin Kurti e përsëriti qëndrimin e tij për heqje të pjesëshme të taksës, duke propozuar që fillimisht taksa të hiqet për lëndën e parë më 15 mars.
“Ftojmë Serbinë që si përgjigje ndaj këtij vendimi të palës kosovare të zotohet se do ta ndërpresë fushatën për çnjohjen e pavarësisë së Kosovës dhe po ashtu të nis me eliminimin e barrierave tregtare jotarifore ndaj Kosovës. Nëse pala serbe dëshmon përkushtim të mirëfilltë në ndalimin e fushatës jomiqësore dhe zotohet për heqje të shpejtë të barrierave jotarifore me Kosovën, atëherë duke filluar nga data 1 prill 2020, Qeveria e Kosovës do të heqë tërësisht tarifën për importet nga Serbia dhe BeH për një periudhë prej 90 ditësh”, deklaroi Kurti.
Ky propozim i tij, nuk është mirëpritur nga pala serbe të cilët e quajtën ‘lojë manovruese brenda politikës së Kurtit’, shkruan lajmi.net.
Ndërkohë, SHBA-të po vazhdojnë t’i bëjnë presion qeverisë kosovare për ta hequr taksën në mënyrë që të rikthehen në tavolinën e dialogut me Serbinë. Madje, SHBA ka paralajmëruar se do të marrë edhe masa ndëshkuese ndaj Kosovës nëse një veprim i tillë nuk ndodhë.
