Michy Batshuayi pritet të largohet përfundimisht nga Chelsea në afatin kalimtar veror.
Sulmuesi belg është pjesë e londinezëve që nga viti 2016, por pa pasur mundësi të luaj rregullisht.
Batshuayi gjatë kësaj kohe është huazuar në tri skuadra si Borussia Dortmund, Valencia e Crystal Palace dhe vetëm në edicionin e fundit është ndalur në skuadër nga Frank Lampard.
Por duket se ditët e tij si futbollist i Chelseat janë të numëruara, pasi belgu nuk preferohet nga Lampard.
Sipas asaj që ka raportuar e përditshmja angleze The Sun, lojtari është nxjerr në shitje nga Chelsea.
Londinezët i kanë caktuar edhe çmimin e largimit dhe për ta lënë të lirë duan 25 milionë euro.
Roma dhe Milan mbeten dy skuadrat e interesuara për ta transferuar Batshuayin në Serie A.
26-vjeçari këtë edicion ka luajtur në 25 ndeshje në të gjitha garat, ku kryesisht është inkuadruar nga banka rezervë, teksa ka shënuar tetë gola e ka bërë tre asistime.
