Përplasjen e partnerëve të koalicionit qeverisës për taksën tanimë po e pranojnë edhe vet zyrtarët e dy subjekteve që po qeverisin, LDK e VV.
Nënkryetari i Lidhjes Demokratike të Kosovës, Lutfi Haziri ka thënë se dallimet mes dy partnerëve të koalicionit për taksën, shpejt do të shkrihen.
Kjo për faktin, se siç ka thënë ai, tarifa e vendosur nga Qeveria Haradinaj, e ka ngufatur Kosovën për shumë kohë.
”Dallimet” do të shkrihen shpejtë. Kosova ka qenë shumë kohë e “ngulfatur” nga tarifa. Po ashtu është punuar shumë që tarifa të “lift” dhe t’i jepet mundësi normalizimit”, ka thënë Haziri për Insajderin.
LDK-ja e Isa Mustafës, po vazhdon ta ketë qëndrimin të kundërt me Vetëvendosjen e Albin Kurtit, duke kërkuar heqjen e plotë të taksës, e jo vetëm pjesërisht dhe me kushte siç deklaroi kryeministri Kurti në një konferencë për media.
Vendimi i Kurtit u kritikua ashpër nga i dërguari special i presidentit Donald Trump, për dialogun mes Kosovës dhe Serbisë, Richard Grenell.
Ai e quajti gabim shumë serioz, vendimin e Kurtit që tarifa të hiqet pjesërisht për mallrat serbe dhe boshnjake. Madje, edhe me disa kushte që siç tha Kurti, duhet t’i plotësojë Serbia, por edhe Bashkimi Evropian.
Por, Lutfi Haziri, thotë se miqtë e Kosovës duhet dëgjuar, meqë asnjëherë nuk i kanë lënë të gabojnë, e as të vonohen në procese të rëndësishme për Kosovën.
“Miqtë e Kosovës nuk na lanë asnjëherë të “gabojmë” apo edhe të vonohemi në procese të rëndësishme për Kosovën. Por, ne duhet t’i udhëheqim këto procese të rënda. Vendim shumë i vështirë, por i domosdoshëm për të sotmen dhe ardhmen e Kosovës”, ka thënë Haziri.
Të enjten në mbrëmje kryeministri Albin Kurti përmes një konference për media, bëri publik lajmin se tarifën do ta heqin nga data 15 mars për lëndën e parë që importohet nga Serbia dhe Bosnja, derisa kishte vendosur disa pika që duhet t’i plotësonte Serbia, e disa edhe Bashkimi Evropiane, në mënyrë që të largohet tërësisht dhe pa kushte tarifa.
Megjithatë, kundër këtij opsioni të Kurtit ishte partneri i tij në koalicion, LDK-ja. Zëvendëskryeministri i parë, që vjen nga LDK-ja, Avdullah Hoti, konfirmoi se Kurti nuk ishte konsultuar me ta për vendimin që ta heqin taksën.
Madje, Hoti tha se nëse Kurti e sjellë në mbledhje të qeverisë për ta votuar vendimin, atëherë ministrat e LDK-së nuk do ta votojnë atë.
Hoti shkoi edhe më larg duke thënë se nuk rrinë në një qeveri ku prishën marrëdhëniet e Kosovës me miqtë ndërkombëtar.
