Sot në orën 15:00 do të varroset ish-luftëtari i UÇK-së, Qerim Kelmendi. Ceremonia e varrimit do të mbahet në kompleksin memorial në Gllogjan, ndërsa paraprakisht do të mbahen homazhe për nder të tij në qendër të qytetit të Pejës. Sipas OVL-së së UÇK-së në Dukagjin homazhet fillojnë nga ora 13:00 deri në 14:00 në sheshin “Shkëlzen Haradinaj”.
Qerim Kelmendi u gjet i djegur në veturën e tij në fshatin Zahaq të Pejës në orët e hershme të mëngjesit të së enjtes.
Qerim Kelmendi ishte anëtar i Lëvizjes Popullore të Kosovës (LPK) dega brenda Kosovës dhe së bashku me vëllain e tij, Ibrahimin ishin pjesë e Ushtrisë Çlirimtare të Kosovës qysh në fillimet e saj.Madje, Qerimi kishte thënë se ishte plagosur në gusht vitit 1996, duke qenë kështu i plagosuri i parë i UÇK-së.
Qerim dhe Ibrahim Kelmendi ishin akuzuar për vrasjet e pasluftës në Kosovë, nga dëshmitari i mbrojtur i Prokurorisë Speciale, Shkumbin Mehmeti, i cili ka qenë pjesë e një grupi kriminal që kreu këto vrasje.
