Presidenti i vendit, Hashim Thaçi ka thënë se kokëfortësia, mungesa e veprimeve dhe e vendimeve të mençura, e ka thelluar izolimin e Kosovës. Në një postim në rrjetin social facebook, ka shkruar se mbetja e tarifës është pengesë serioze për Kosovës.
Më tutje ka shkruar se është e nevojshme që me urgjencë të merren vendime të duhura, ku këtë i’a ka kërkuar edhe Sekretari Pompei, shkruan InLajmi.
“Kokëfortësia, mungesa e veprimeve dhe e vendimeve të mençura, e ka thelluar izolimin e Kosovës dhe ka prishur në mënyrë të ndjeshme raportet tona speciale me SHBA-në. Mbetja në fuqi e tarifës është pengesë serioze dhe e pamundëson bashkëpunimin strategjik dhe investimet e reja të fuqishme amerikane në Kosovë. Prandaj, nevoja që me urgjencë të merren vendimet e duhura ishte kërkesë dhe mesazh kryesor në takim me Sekretarin Pompei dhe me Këshilltarin për Siguri Nacionale, O’Brien”, ka shkruar presidenti Thaçi.
Presidenti tregon edhe për kërkesën e tij që pa humbur kohë të merren vendime të duhura strategjike, të cilat I japin fund izolimit dhe I hapin mundësi dialogut për një marrëveshje përfundimtare.
“Edhe kërkesa ime e qartë si president për qeverinë, për spektrin politik dhe mbi të gjitha për qytetarët e Kosovës është që pa humbur kohë të merren vendimet e duhura strategjike, të cilat i japin fund izolimit, i hapin mundësi dialogut për arritjen e marrëveshjes përfundimtare dhe e forcojnë miqësinë e përhershme dhe bashkëpunimin strategjik me SHBA-në”, ka vazhduar Thaçi./InLajmi/
