Një ngjarje e rëndë ndodhi në orët e vona të natës së kaluar në Zahaq të Pejës.
Qerim Kelmendi u gjet pa shenja jete brenda një veturë e cila ishte përfshirë nga zjarri.
Lidhur me këtë para mediave është deklaruar zv /komandanti Policisë për Rajonin e Pejës, Veton Elshani.
“Rreth orës 01:30 minuta PK-ja është informuar se në fshatin Zahaq në një rrugë është duke u djegur një veturë.Me të marrë informatën policia ka dalë në vendin e ngjarjes, pra janë njoftuar edhe zjarrfikësit të cilët e kanë shuar zjarrin, pro pastaj kanë parë se në veturë gjendet një person i pa jetë. Rastit i janë përgjigjur policia, prokurori i shtetit si dhe ekipi mjekësor që ka konstatuar edhe vdekjen. Gjatë shikimit të rastit është konstatuar se vetura është Passat kurse për rastin janë duke u ndërmarrë të gjitha veprimet në mënyrë që të sqarohen të gjitha rrethanat e kësaj ngjarje”, tha Elshani.
Tutje ai shtoi se për momentin nuk ka diçka për t’u shtuar, por që ekziston mundësia që pati të shtëna me armë zjarri dhe nga këto të shtëna personi në fjalë ka ndërruar jetë.
“Por pa dalë konstatimet e sakta nga raportet e ndryshme s‘mund të themi diçka tjetër”, shtoi Elshani, shkruan Indeksonline.
Qerim Kelmendi ndryshe njihej edhe si njëri prej themeluesve të Lëvizjes Popullore të Kosovës që më pas ishte shndërruar në Ushtri Çlirimtare të Kosovës.
