Presidenti i Kosovës Hashim Thaçi, në një intervistë për BBC-në serbe ka thënë se nëse nuk lëvizë diçka me Serbinë këtë vit, ka frikë se do të humbasim dekada sa i përket normalizimit të marrëdhënieve në mes të të dyja vendeve.
“Nëse diçka ndodh në negociatat me Serbinë, do të ndodhë këtë vit. Nëse nuk ndodh këtë vit, kam frikë se do të humbasim dekada, “thotë presidenti.
Derisa negociatorët e tjerë thonë se nuk nevojitet presion dhe nxitim, Thaçi sqaron se viti i fundit i mandatit të parë të presidentit Donald Trump është koha më e mirë për të arritur një marrëveshje në Ballkan.
“Unë nuk mendoj se mund të marrim përsëri vëmendjen e Presidentit Trump, SHBA-së dhe ekipit të tij. Ky kthim i vëmendjes së SHBA-së në rajonin tonë është një dhuratë nga Zoti si për Kosovën ashtu edhe për Serbinë – ne duhet ta përdorim atë “, ka deklaruar Presidenti përcjell Periskopi.
Presidenti i vendit tutje ka theksuar se po aq sa jemi afër për arritjen e një marrëveshje me Serbinë, jemi po aq larg.
Ndërsa ka theksuar se Kosova është shtet i pavarur dhe Serbia e di këtë.
“Asnjëherë nuk kemi qenë më pranë një marrëveshje sepse shumë procese të tjera kanë përfunduar – Kosova është e lirë dhe e pavarur, dhe Serbia e di për pavarësinë e Kosovës. Në të njëjtën kohë, jemi shumë larg – do të varet shumë nga liderët e të dy vendeve, pavarësisht nëse ata do të investojnë në të ardhmen apo do të mbeten peng të së kaluarës “, ka deklaruar Presidenti.
Thaçi është pyetur edhe për raportet me presidentin e Serbisë Aleksandar Vuçiq dhe takimin me të në forumet ndërkombëtare.
“Unë nuk kam asnjë marrëdhënie të veçantë, personale me Presidentin Vuçiq – ne jemi presidentët e shteteve të pavarura, të zgjedhur në mënyrë të ligjshme, dhe unë promovoj pikëpamjet e vendit tim në çdo forum dhe para të gjithë zyrtarëve, përfshirë presidentin e Serbisë. Ne kemi pasur dallime në të kaluarën, ato ekzistojnë edhe sot, por kjo nuk duhet të na ndalojë pasi dy presidentë që flasin për të ardhmen “, ka deklaruar Thaçi.
Në të ardhmen, Thaçi beson se as Kosova dhe as Serbia nuk mund të mbështeten në anëtarësimin në Bashkimin Evropian (BE) pa një marrëveshje përfundimtare.
“Nëse e humbim këtë mundësi, ne do të qajmë në portat e Brukselit, por kjo nuk do të shqetësojë askënd dhe nuk do ti interesojë askujt” përfundon ai.
