Menjëherë pas ardhjes në krye të Qeverisë, kryeministri Albin Kurti paralajmëroi zëvendësimin e taksës me reciprocitet ndaj Serbisë, por ky propozim i shefit të ekzekutivit nuk gjeti mbështetjen e subjekteve opozitare.
Derisa partitë në pushtet dhe ato që janë pjesë e opozitës s’po arrijnë dot t’i harmonizojnë qëndrimet rreth dialogut, SHBA-ja nuk po rresht së kërkuari vazhdim sa më të shpejtë të procesit të negociatave.
Ani pse javët e fundit Shtetet e Bashkuara të Amerikës (SHBA) kanë intensifikuar thirrjet për rinisjen e dialogut dhe për arritjen e marrëveshjes finale Kosovë – Serbi, spektri politik në Kosovë po vazhdon të jetë i përçarë rreth këtij procesi.
Derisa Qeveria ka paralajmëruar heqjen e taksës dhe vendosjen e masës së reciprocitetit ndaj Serbisë, subjektet opozitare nuk i kanë dhënë mbështetje këtij opsioni. Përfaqësuesit e taborit opozitar kanë kritikuar Qeverinë për mossqarim të mjaftueshëm rreth reciprocitetit të paralajmëruar. Në anën tjetër përfaqësuesit e partive në pushtet, të LVV-së dhe të LDK-së, nuk kanë dhënë ndonjë afat konkret se kur do të hiqet përfundimisht tarifa 100 për qind dhe kur do të vendoset masa e reciprocitetit, ndonëse kanë pohuar se një gjë e tillë do të ndodhë së shpejti.
Në tryezën “Dialogu Kosovë – Serbi: Çfarë pas formimit të qeverisë së re dhe përfshirjes amerikane?”, të organizuar nga Instituti Demokratik i Kosovës (KDI), përfaqësuesit e partive në pushtet thanë dje se qeveria e re duhet të ketë objektiva të qarta në procesin e negociatave, shkruan gazeta Zëri.
Në kuadër të kësaj, siç ata u shprehën, nuk duhet assesi të ketë diskutim rreth hartave, rrjedhimisht territori i Republikës së Kosovës duhet të jetë i panegociueshëm.
