Agim Veliu i cili deri dje ishte kryetar i komunës së Podujevës, ka marrë pozitën e ministrit të Brendshëm në qeveri. Për këtë arsye, Podujeva ka mbetur pa kryetar komune.
Ndërkohë në këtë komunë subjektet partiake kanë nisur përgatitjet për zgjedhje të jashtëzakonshme.
Nga Ministria e Administrimit të Pushtetit Lokal thonë për lajmi.net se me ligj zgjedhjet e parakoshme nuk mund të mbahen më herët se 30 ditë dhe jo më vonë se 45 ditë pas shpërbërjes.
“Ligji nr. 03/l-072 për zgjedhjet lokale në Republikën e Kosovës, ka paraparë se zgjedhjet e parakohshme nuk mund të mbahen më herët se tridhjetë (30) ditë dhe jo më vonë se dyzetepesë (45) ditë pas shpërbërjes, në rastin konkret dorëheqjes së Kryetarit”, thuhet në përgjigjen e MAPL.
Më pas Ministria e Administrimit të Pushtetit Lokal, në përputhje me mandatin e përcaktuar me Ligjin Nr. 03/L-040 për Vetëqeverisje Lokale e njofton Presidentin e Kosovës për të ndërmarrë veprimet ligjore për shpalljen e zgjedhjeve lokale të jashtëzakonshme për Kryetar të Komunës së Podujevës, ashtu siç parashihet në dispozitat e Ligjit Nr. 03/L-040 për Vetëqeverisje Lokale dhe nenit 11.2 të Ligjit Nr. 03/L-072 për Zgjedhjet Lokale në Republikën e Kosovës.
Në komunën e Podujevës, Lëvizja Vetëvendosje dhe Lidhja Demokratike kanë deklaruar se janë të gatshme për zgjedhje, madje këta të fundit u shprehën të bindur se do të dalin fituese.
Ndërsa nga Partia Demokratike e Kosovës dhe Aleanca për Ardhmërinë e Kosovës u tha se ende nuk kanë diskutuar për këtë çështje.
Vlen të theksohet se Veliu ka udhëhequr 10 vite me komunën e Podujevës. Por , sot, Veliu pritet të japë dorëheqje nga pozita e kryetarit të komunës. Tashmë, kompetencat në komunë i ka marrë nënkryetari i tij, Nexhmi Rudari.
