Një drejtoreshë e një shkolle nga Uashingtoni sugjeroi në një postim në rrjetin social Facebook se Kobe Bryant e meritonte vdiste, ditën kur ai u vra pasi iu rrëzua helikopteri me të cilin po udhëtonte.
Drejtoresha e shkollës së mesme Camas në Uashington, Liza Sejkora, së fundi kërkoi falje për postimin e saj në Facebook, të cilin e kishte bërë më 16 janar – pikërisht ditën kur vdiqën Kobe Bryant, vajza e tij 13-vjeçare Gianna dhe shtatë persona të tjerë.
“Nuk do të gënjej. Më duket se karma ia tregoi veten një përdhunuesi sot”, kishte shkruar Sejkora, e cila më vonë i quajti vetë fjalët e saj “të papërshtatshme dhe joadekuate”.
Një punëtore 19-vjeçare e një hoteli në Kolorado e kishte akuzuar Bryant-in, i cili atëherë ishte 25-vjeçar, në vitin 2003 se e kishte përdhunuar në një dhomë hoteli.
Ikona e basketbollit në NBA ishte arrestuar shkaku i kësaj akuze, mirëpo prokurorët më vonë i tërhoqën akuzat pasi që akuzuesja e tij s’kishte pranuar të dalë dëshmitare.
Për akuzën civile të cilën e ngriti gruaja ndaj Bryant u arrit marrëveshje jashtë gjykatës në vitin 2005, për një shumë parash që nuk është bërë kurrë e ditur.
Sejkora së fundi ka thënë se ajo dëshiron “të kërkojë falje që ka sugjeruar se një person e meriton të vdesë. Ajo deklaratë ishte e papërshtatshme dhe joadekuate”, transmeton gazeta Express.
Ajo iu referua komenteve të saj si “reagim personal, të thellë”.
