Kjo është ministrja e panjohur e Albin Kurtit

Rozeta Hajdari, është betuar mbrëmë si Ministre e Ekonomisë. Mbrëmë ajo pati paraqitjen e saj të parë publike.

Hajdari u shfaqë gjatë ditës së djeshme në Kuvendin e Kosovës, për të zënë ulësen e ministres, pozitë për të cilën e ka propozuar shefi i tij, Albin Kurti.

Deri tash, Rozeta Hajdari ka qenë e panjohur për të gjithë. Nuk dihet nëse më parë ka punuar në institucionet shtetërore, mirëpo sot mori zyrtarisht detyrën e saj.

Hajdari është e lindur në Pejë, por jeton në Prishtinë. Në Agjencinë për Regjistrimin e Bizneseve (ARBK) emri i Rozeta Hajdarit figuron si pronare e një kompanie biznesore.

“R&V Consulting” është firma private, pronare e të cilës figuron të jetë Hajdari. Kjo firmë merret me këshillimin e bizneseve.

Po ashtu, nga të dhënat e saj në rrjetin social LinkedIn, mësohet se ajo punon si koordinatore për Arsimin e Lartë në Austrian Development Agency, një organizatë jo-qeveritare austriake që vepron në Kosovë.

Kurti nisi sot ditën e parë në krye të ekzekutivit, me një parakalim mbi tapetin e kuq të shtruar vetëm për të, ai pranoi detyrën e tij nga zëvendëskryeministri në detyrë, Behgjet Pacolli.

Me dy zëvendësit e tij në krahë, Avdullah Hotin dhe Haki Abazin, Kurti u shpreh se programi i tyre është aq ambicioz sa pritjet e qytetarëve.

Për pesëmbëdhjetë (15), ministrat e kabinetit të tij, Kurti e pati një kërkesë të veçantë. Ta mësojnë përmendësh programin qeverisës.

“Të gjithë ne të mësojmë përmendsh, programin tonë që del nga marrëveshja jonë e përbashkët sepse me të do të zgjohemi në mëngjes, e me të do të flemë në mbrëmje. Le të bëhemi të thjeshtë e të drejtë ashtu siç i kemi qytetarët tanë që janë aq të mirë”, ishte kërkesa e parë e Kurtit për kabinetin e tij, shkruan Insajderi.

Për dallim nga qeverisja e kaluar e cila kishte 21 ministri, kabineti i ri është dukshëm më i vogël në numër. Qeveria Kurti përbëhet nga 15 ministra e 33 zëvendësministra.