Kryeparlamentarja Vjosa Osmani, ka larguar nga zyra e saj fotografinë e presidentit, Hashim Thaçi.
Në ditën e saj të punës, kryeparlamentarja Vjosa Osmani ka larguar fotografinë e presidentit Hashim Thaçi nga ambienti i zyrës së saj dhe e ka zëvendësuar atë me fotografinë e ish-presidentit Ibrahim Rugova.
Pas këtij veprimi të Osmanit, ka reaguar deputetja e Partisë Demokratike të Kosovës (PDK), Blerta Deliu-Kodra, shkruan lajmi.net.
Përmes një postimi në profilin e saj zyrtar në rrjetin social Facebook, Deliu-Kodra, ka thënë se Osmani ka shkelur Ligjin për Protokollin e Shtetit me heqjen e fotogrfisë së presidentit Thaçi.
Postimi i plotë i Deliu-Kodrës pa ndërhyrje:
Logoja simbolike e presidentit Ibrahim Rugova me flamurin dardan, për të cilën nuk ekziston asnjë vendim, asnjë procesverbal dhe asnjë bazë ligjore që e mbështetë mbajtjen e saj, për hir të respektit dhe madhështisë së Hashim Thaçit, ende figuron në zyrën e tij.
Fotografia zyrtare e presidentit, të cilën obligohen ta vendosin të gjitha institucionet e Republikës së Kosovës në mjediset e tyre bazuar në Ligjin për Protokollin e Shtetit, sot u hoq nga kryeparlamentarja e re, Vjosa Osmani, e cila qysh në ditën e parë të punës bëri shkelje ligjore.
Mandati i saj është udhëheqja e organit që nxjerr dhe miraton të gjitha ligjet, por siç edhe dëshmoi, vetë ajo është selektive në zbatimin e legjislacionit të Kosovës.
Ky është një standard i ri për institucionet e Kosovës dhe një lojë tërësisht fëmijërore që nxjerr në pah më së shumti papjekurinë politike dhe teket personale të Vjosa Osmanit.
