Mjekët kinezë kanë mundësuar lindjen me operacion të një foshnjeje nga një nënë që dyshohet se është infektuar nga koronavirusi. Lindja është bërë nëpërmjet një operacioni çezarian në qytetin Wuhan, epiqendra e shpërthimit, njofton reuters.
Doktori që kreu operacionin tha se gjendja e nënës 27 vjeçe po përkeqësohej dhe foshnja që duhet të lindte po ndikonte fort.
Në të njëjtën kohë, gruaja nuk mund të kurohej për sëmundjen përsa kohë kishte ende në bark fëmijën.
Operacioni qe jashtëzakonisht i rrezikshëm sepse nëna kishte temperaturë dhe kollitej pa pushim e nga ana tjetër mjekët rrezikonin të infektoheshin me koronavirusi, njoftoi televizioni shtetëror.
Doktori që kreu operacionin, Zhao Yin, Zv.drejtor në Repartin e Obstetrikë-Gjinekologjisë në Spitalin e Wuhan veshi dy kostume mbrojtëse, një maskë fytyre dhe vuri syze speciale gjatë operacionit njëorësh.
“Mezi shikoja e mezi dëgjoja”, tha Zhao në televizionin shtetëror. “Dhe u bëra ujë me djersë”.
Virusi ka vrarë 106 persona dhe ka infektuar më shumë se 4500 persona në të gjithë Kinën.
Gruaja e identifikuar si Xiaoyang ishte 37 javëshe shtazanë kur u dyshua se ishte infektuar nga koronavirusi në fillim të janarit. Infektimi i saj nuk është konfirmuar, tha televizioni shtetëror.
Foshnja që lindi, një djalë 3.1 kg u dërgua në shtëpi me shpejtësinë më të madhe të mundshme për të shmangur rrezikun që ai të infektohej nga virusi në spital, tha televizioni shtetëror.
“Dua vetëm që bebi im të jetë i shëndetshëm”, tha nëna e re Xiaoyan në televizionin shtetëror.
