Presidenti i Kosovës, Hashim Thaçi, në Ditën Ndërkombëtare të Holokaustit, ka kujtuar edhe krimet që Serbia i ka kryer në Kosovë.
Hashim Thaçi, ka shfrytëzuar Ditën Ndërkombëtare të Holokaustit, për të thënë se Serbia ende i mohon krimet që shkaktuan holokaustin ballkanik në Bosnje dhe Kosovë, shkruan InLajmi.
Përmes një postimi në rrjetin social Facebook, Thaçi, ka shkruar se, ideja dhe përpjekjet për shfarosjen e njerëzve dhe etnive u vazhdua edhe nga regjimi i Serbisë në Bosnje e Hercegovinë dhe në Kosovë.
Postimi i plotë i tij:
Kosova sot i bashkohet kujtimit për viktimat e Holokaustit, një krim gjenocidal dhe monstruoz që tmerroi gjithë botën.
Pas Luftës së Dytë Botërore u mendua se vuajtjet e miliona njerëzve të vrarë mizorisht do ta shndërronin Holokaustin në një krim të papërsëritshëm për njerëzimin.
Por, ideja dhe përpjekjet për shfarosjen e njerëzve dhe etnive u vazhduan edhe nga regjimi i Serbisë në Bosnje e Hercegovinë dhe në Kosovë.
Masakrat dhe spastrimi etnik u ngjanin atyre të Luftës së Dytë Botërore.
Dhe, fatkeqësisht, Serbia edhe sot vazhdon t’i mohojë krimet që shkaktuan holokaustin ballkanik në këtë pjesë të Evropës./InLajmi
