Dhimbja e kokës e shkaktuar nga konsumimi i gjërave të ftohta, e njohur gjithashtu si “ngrirja e trurit” apo dhimbja e kokës e stimuluar nga i ftohti, është një dhimbje koke që disa njerëz e pësojnë kur konsumojnë një ushqim apo një pije të ftohtë shumë shpejt.
Dhimbja zakonsht ndihet në pjesën e ballit apo të dy tëmthave, dhe në shumicën e rasteve nuk zgjat më shumë se pesë minuta.
Shkaku i kësaj dhimbjeje është i debatueshëm, por shumica e ekspertëve besojnë se fillon kur një substancë e ftohtë prek pjesën e sipërme të gojës apo pjesën e pasme të fytit, dhe shkakton që enët e vogla të gjakut në ato zona të ngushtohen dhe pastaj të zgjerohen shumë shpejt.
Receptorët e dhimbjes afër enëve të gjakut e ndjejnë parehatinë dhe dërgojnë mesazhe nëpërmjet fibrave nerovore të vogla në një nerv më të madh (nervi trigeminal), që pastaj i çon këto mesazhe në tru. Nervi trigeminal mbart gjithashtu dhe sinjalet e dhimbjes nga fytyra. Truri i lexon ndjesitë e stimulit të ftohtë sikur vijnë nga koka në vend të gojës, një fenomen që quhet dhimbje e referuar.
Dhimbja e stimuluar nga i ftohti është e zakonshme dhe ndodh në 30% deri në 40% të njerëzve që zakonisht nuk kanë dhimbje koke. Simptomat janë të padëmshme dhe nuk janë shenjë e ndonjë sëmundje të fshehur, edhe pse shumë ekspertë besojnë se këto dhimbje janë më të shpeshta në personat që vuajnë nga migrena.
Meqënëse dhimbjet e kokës nga konsumimi i gjërave të ftohta janë kaq të shkurtra, ato janë të veshtira për t’u studiuar dhe nuk ka një konsensus se si mund të ndalen. Shumica e njerëzve kanë metodat e tyre, më e shpeshta prej tyre është të rrotullosh gjuhën dhe të prekësh me pjesën e poshtme të saj, pjesën e sipërme të gojës.
Mënyra më e mirë për të parandaluar dhimbjet e kokës është që ushqimet e ftohta të konsumohen shumë ngadalë.
