SC Gjilani është duke e zhvilluar fazën përgatitore në Antalia të Turqisë, para se të fillojë pjesa e dytë e kampionatit të Kosovës. SC Gjilani është duke e zhvilluar ndeshjen e radhës kundër klubit rus, Yenisy Krasonyarsk, që bën gara në ligën e dytë të Rusisë, shkruan Insporti.com.
Kjo ndeshje është e karakterit miqësor, por klubi nga Kosova ka lëshuar një “gafë”. Klubi rus po e konsideron SC Gjilanin si klub nga Serbia.
Insporti ka kontaktuar me presidentin e klubit, Florim Zuka, i cili ka deklaruar se kjo është një tjetër propagandë serbo-sllave dhe ka theksuar se Gjilani është nga Kosova. “Nuk jam në dijeni tash u njoftova. Jemi të mësuar me këtë lloj propagande serbo sllavo ruse. Ata mund te shkruajnë si te dojnë Gjilani është i Kosovës së pavarur”.
I pyetur se a do të tërhiqen nga ndeshja, Zuka për Insportin deklaroi se nuk po arrin të kontakton me zyrtarët e klubit që janë prezent në ndeshje.
Klubi rus në kanalin e tyre në “Youtube” për ta ndjekur direkt ndeshjen miqësore, Yenisey Krasonyarsk e ka përshkruar Gjilanin si klub serb, ndërsa ky link është shpërndarë në Facebook nga SC GJilani.
“Në linkun e mëposhtëm mund ta shikoni live ndeshjen FC Yenisey vs SC Gjilani, e cila fillon në ora 11:00 sipas kohës lokale në Kosovë”, thuhet në njoftimin e klubit të Superligës, ndërsa transmetimi direkt është titulluar “Ndeshja miqësore Yenisei vs Gilani (Serbia)”
Ndeshja testuese e SC Gjilanit kundër klubit që sezonin e kaluar luajti në Premierligën ruse po zhvillohet në “Emirhan Football Center” në Antalia të Turqisë. Futbollistët e drejtuar nga trajneri Gentian Mezani janë në epërsi minimale 1:0.
SC Gjilani sezonin vjeshtor e përfundoi në pozitën e dytë me 32 pikë, pas 17 xhiro të zhvilluara.
